Eurocontrol ul tarifat e aeroporteve për Tiranën dhe Kukësin
Rikthimi i plotë i normalitetit sa i takon lëvizjes së lirë pas fshirjes së efekteve që la COVID-19 ka bërë që edhe volumi i fluturimeve me linja ajrore të rritet në mënyrë të dukshme.
Pikërisht ky normalitet duket se ka ndikuar në rishikimin në kahun ulës të tarifave aeroportuale.
Eurocontrol, organizata që menaxhon trafikun ajror europian dhe faturon e mbledh tarifat (për llogari të Albcontrol) vendosi që për vitin 2023 tarifa për Aeroportin e Tiranës të jetë 219.45 euro me një ulje me rreth 4.4 për qind në raport me tarifat që ishin në fuqi për vitin 2022.
Ndërkohë ulje tarife ka edhe për aeroportin e Kukësit. Ky aeroport i cilësuar si pjesë e zonës 2 do të ketë një tarifë 109.73 euro nga 117.84 që e kishte gjatë 2022.
Në njoftim thuhet se për pagesat e vonuara do të aplikohet edhe interes, i cili për këtë vit është 9.97% duke pësuar rritje në raport me interesin e vitit 2022.
Në vend aktualisht janë funksionalë vetëm këto dy aeroporte teksa është në ndërtim një i tretë në Vlorë pas një koncesioni të dhënë nga ana e qeverisë. Një aeroport i katërt u tentua të kalohej përmes çeljes së një procedure në Sarandë por e hapur në periudhën e pandemisë ajo nuk rezultoi e suksesshme gjithsesi në deklarata qeveria i ka qëndruar ndërtimit të një aeroporti turistik në skajin më jugor të vendit.
Çfarë është tarifa e terminalit
Në një shpjegim të zgjeruar të Eurocontrol tarifat e terminalit janë fatura që dërgohen nga Eurocontol çdo muaj (në mes të muajit pasues) për fluturimet që u zhvilluan në muajin paraardhës bashkë me faturën e tarifës së itinerarit. Dokumentet e faturimit tregojnë qartë shtetin për të cilin vilen këto para. Termat e pagesës për pjesën e tarifave të terminalit janë të njëjta me ato të itinerarit që aplikohen nga Eurocontrol që do të thotë 30 ditë nga data e faturimit.
Lidhur me mënyrën sesi llogariten këto tarifa, Eurocontrol sqaron se vendet anëtare përcaktojnë zonat e tarifimit për terminalet që mund të jetë një aerodrom apo disa aerodrome që lokalizohen në një vend të caktuar ku ofrohen shërbime për të cilën duhet të paguhet tarifë. Tarifat e terminalit vendosen vetëm për fluturimet që nisen dhe marrin parasysh dy elemente thelbësore.
Së pari, peshën e avionit që niset dhe së dyti, njësinë e tarifës për aerodromin nga ku bëhet nisja. Rezultati që merret pasi bëhet shumëzimi i dy elementëve është vlera që paguhet për terminalin. Faktori i peshës llogaritet në ton metrike./Monitor/
