“Skandali McGonigal”, Berisha: Edi Rama është agjent influent i Putinit!
Një ditë pas publikimit të aktakuzë së zyrtarit të lartë të FBI, Charles McGonigal, i arrestuar të shtunën nga autoritetet amerikane se ka marrë para nga ish-punonjësi i Sigurimit të Shtetit, Agron Neza, dhe për lidhjet e tij me zyrtarë të tjerë në Shqipëri ku lakohet dhe emri i Kryeministrit, Kryetari i i Partisë Demokratike, Sali Berisha, para Grupit Parlamentar të PD, vlerëson se Edi Rama është i përfshirë në mënyrën më të pakontestueshme në një nga aferat më të zeza të kohërave.
Duke pasur parasysh detajet nga aktakuza, ku ish-zyrtari i lartë i FBI McGonigal bashkëpunon me njeriun më të afërt të Putinit, Oleg Deripaska, i cili na del dhe investitor strategjik i Edi Ramës, Kryetari i PD rendit arsyet pse Edi Rama është agjent influent i Putinit.
“Mblidhemi sot në një ditë kur Shqipëria është në epiqendër të një stuhie, e cila në memorien historike, nuk ka ekzistuar të paktën në 50 vitet e fundit.
Shqipëria, Edi Rama, kreu i ekzekutivit është i përfshirë në mënyrën më të pakontestueshme në një nga aferat më të zeza të kohërave, në një akt që tejkalon çdo normë, çdo standard, çdo ligj,çëdo moral, çdo imagjinatë.
De facto, ai ka përdorur si aset të tij, një nga njerëzit më të rëndësishëm të sistemit të sigurisë së SHBA, për definicion të botës së lirë, ish-shefin e kundërinteligjencës të FBI, një nga njerëzit më të besuar të asaj toke dhe atij vendi, Charles McGonigal.
Me qëndrimin e tij të papërgjegjshëm, Edi Rama përpiqet të hiqet duarjashtë.
Në një kohë kur aktakuza e botuar nga Ministria e Drejtësisë e SHBA, në 16 faqet e saj, të paktën 15 i kushtohen fund e krye, Edi Ramës, ish-oficerit të policisë sekrete, bashkëpunëtorit të SHISH, Agron Nezaj, këshilltarit në hije të Edi Ramës, Dorian Duçkës.
Berisha: Kryeministri i një vendi anëtar të NATO-s, përdor mjete të paligjshme për të korruptuar zyrtarin e lartë të FBI
Edi Rama është sjellë në mënyrën më të pabesë, më jomiqësore ndaj partnerit tonë kryesor strategjik. Duke keqshfrytëzuar, duke trajtuar si aset, në mënyrë të fshehtë një njeri që nuk meritonte kurrë atë post që kishte.
Charles McGonigal ka dy akuza kryesore: njëra është ky, i ngarkuar për të mbikëqyrur Oleg Vladimirovië Deripaskën, një njeri nga më të afërmit e Putinit, në fakt u shndërrua në aset të tij.
Ajo që është akti më i rëndë, një kryeministër i një vendi anëtar të NATO-s, përdor mjete të paligjshme për të korruptuar këtë zyrtar.
Çfarë dëshmon për Shqipërinë dhe shqiptarët kjo aferë nga më tronditëset? Kjo dëshmon se mafia shqiptare është mafia më e rrezikshme e botës së lirë.
Se tentakulat e kësaj mafie, Neza, Duçka, Rama, janë të aftë të kryejnë çdo lloj operacioni të fëlliqur.
Duke shkelmuar interesat jetike të sigurisë të SHBA, por edhe të NATO-s dhe botës së lirë në tërësi,” tha Berisha duke saktësuar se në vend që të informonin menjëherë vendin partner, këta e shfrytëzuan dobësitë e tij dhe e angazhuan në një luftë politike të paimagjinueshme.
“Mafia qeveritare shqiptare është mafia më e rrezikshme e Europës dhe planetit. Shqipëria me dy mafiozë, Agron Nezën dhe Dorian Duçkën, arrin të fusë në rrjetë një njeri të brishtë nga morali dhe çdo gjë.
Në vend që të informonin menjëherë vendin partner, këta e shfrytëzuan dobësitë e tij dhe e angazhuan në një luftë politike të paimagjinueshme.
E paguan atë për veprimtari antikushtetuese në SHBA. E paguan atë për përdorimin e institucionit themelor të sigurisë së SHBA, të brendshëm, për qëllime politike. E paguan që të përdorë FBI si një agjenci private.
Edi Rama është bashkautor në këtë krim të shëmtuar.
McGonigal ka bërë gjashtë udhëtime në Shqipëri. Ka bërë takime jo vetëm me Edi Ramën, por edhe me Ardi Veliun, me kupolën e policisë, etj.” tha lideri opozitës duke folur për të gjitha shpenzimet që i ka bërë me pagesë, me faturë dhe që të gjitha udhëtime të fshehta.
“Që të gjitha pa deklaruar oficerin e sigurimit që e shoqëronte edhe deri në tualet, Agron Nezën. Askund nuk e tregonte
Merrte 225 mijë dollarë prej tij, por krijonte edhe ndërmarrje bashkë me të, që të zhvaste edhe 500 mijë dollarë në Bosnje për takime në misionin e SHBA në OKB.
Rama me Nezën dhe Duçkën bënë gjithçka që t’i japin mundësi këtij njeriu, që të shkelmojë rregullat dhe kodin e institucionit të tij, institucion me rëndësi themelore jo vetëm për SHBA, por edhe për mbarë vendet e NATO-s dhe vendet e lira.
Ajo që të bën përshtypje, ndonëse flet e mbarë bota, mendon se do e kalojë me një Twitter, ku thotë se aty nuk flitet për mua.
Nxjerr mjeranë dhe pseudoanalistë dhe betohet që në 16 faqe, ku flitet vetëm për të dhe bashkëpunëtorët e tij, se akuzën tjetër, për paratë e Deripaskës nuk e kanë publikuar. Pra 16 faqe janë vetëm afera shqiptare. Këto janë akte tmerrësisht të rënda në marrëdhëniet mes dy vendeve. Është një pabesi ekstreme,” tha Berisha duke vazhduar të flas para Grupit Parlamentar për njeriun më të afërt të Putinit i cili del investitor strategjik i Edi Ramës
“Të vijmë pak te Oleg Deripaska, i cili duket se e ka aset McGonigal, se kanë larë paratë së bashku.
Por ky na del në Shqipëri investitor strategjik, ndërtues hidrocentralesh, pronar licencash hidrocentralesh.
Mos të harrojmë se është një nga njerëzit më të afërt të Putinit.
Me të drejtë shtrohet pyetja, si ka mundësi që përdoren paratë për të lobuar kundër opozitës?
Shqiptarët mësuan, e kam deklaruar shumë herë, se është përdorur korrupsioni ndërkombëtar për të luftuar antikorrupsionin në Shqipëri.
Dëgjojeni pak se çfarë thotë ortaku i McGonigal në firmën e përbashkët që kanë ngritur në Tiranë, Mark Rossini. Edhe ky ish-zyrtar i lartë.
Ky në një deklaratë të paguar, në vitin 2019, thotë se Berisha është një kukull e Putinit. Për llogari të Edi Ramës. Pra, kjo ishte një ofensivë e korruptokracisë kundër opozitës.”
Në fund, Kryetari i Partisë Demokratike, Sali Berisha, sqaron pse Edi Rama është agjent influent i Putinit:
“Unë i kam ndjekur debatet, analizat për këtë çështje. Dje, sot dhe gjithnjë do them se Edi Rama në këtë aferë është sjellë absolutisht si agjent i Putinit. Se përfituesi më i madh nga kjo aferë është Rusia.
Pse them se është sjellë si agjent influent? Unë konstatova se pata reagime nga analistë.
Unë u kërkoj këtyre analistëve që të hapin dhe të lexojnë se çfarë është agjenti influent.
Agjenci influent është person që ka një status, në përkufizimin e fjalorëve politikë, dhe e përdor pozicionin e tij për të influencuar publikun në qëndrime, drejtime dhe politika të caktuar siç i intereson një fuqie tjetër.
Agjentët influentë janë tre kategori.
Agjenti që ka një status dhe ka firmosur dhe atij i vijnë udhëzimet përmes agjentit tjetër. Nuk e di, megjithëse ka shumë gjëra të errëta, qoftë në trashëgimi familjare, qoftë në drurin familjar, nuk e di.
Kategoria e dytë e agjentit influent janë ata që veprojnë me ndërgjegje, pa firmë dhe janë njëlloj me të parët. U them atyre që reaguan se do gjeni prej tyre që kanë shkuar edhe në gijotinë për veprimin e tyre pa firmë, por kanë mbrojtur edhe njëlloj sikur të ishin nazistë apo stalinistë, kauzat e gabuara. Këta quhen agjentë influentë.
Kategoria e tretë e agjentëve influentë janë idiotët e dobishëm. Idioti i dobishëm është spontan, është sporadik. Bën deklarata dhe shfrytëzohet deklarata e tij dhe pastaj është një copë asgjë,” tha Kryetari i Partisë Demokratike, Sali Berisha, para Grupit Parlamentar të PD duke përfunduar:
“Të më thotë kush se a ka deklaratë më të dobishme për Putinin se deklarata e Edi Ramës: mos i bini në qafë Serbisë, për të respektuar sanksionet? Me fjalë të tjera, lëreni të mbetet prapavijë e Rusisë. Është e qartë si drita e diellit se kujt i intereson kjo deklaratë. Asnjë lider evropian, përveç tij nuk e bën. Këtu Deripaska është strategjik.
Së dyti, kujt i intereson deklarata e Edi Rama në Davos se e ndaluat mallin e pistë rus, dhe morën nga të tjerët, më keq se rusët. Po kush është sot më keq se rusët, që agreson dhe bën kasaphanë në një popull? Kujt i intereson kjo? Pse, nuk e di Europa? Në vend të duartrokitet Gjermania, që e zeroi importin rus, Edi Rama u thotë se e latë mallin e pistë, për të marrë mall më të pistë.
A nuk është kjo një shprehje me kuptim politik totalisht në mbrojtje të Putinit.”
