Kurti me kancelarin Scholz dhe ministren Colonna, përgatitjet për takimin e radhës në Bruksel

Qeveria e Kosovës po dëshmon përkushtim për Procesin e Berlinit dhe në këtë sfond ka miratuar tashmë tri marrëveshjet e nënshkruara me 3 nëntor në Berlin, e së shpejti do të ratifikohen edhe në Parlament. Kështu ka deklaruar kryeministri Albin Kurti gjatë një takimi që zhvilloi në Munich me kancelarin e Gjermanisë, Olaf Scholz dhe ministren për Evropë dhe Punë të Jashtme të Francës, Catherine Colonna.

Në këtë takim ku Albin Kurti shoqërohej nga Zv/ryeministrja dhe ministrja e Punëve të Jashtme dhe Diasporës, Donika Gërvalla, në kuadër të Konferencës së Sigurisë në Munich, është biseduar për progresin në Kosovë, i cili sipas kryeministrit kosovar është evidentuar edhe nga shumë organizata ndërkombëtare si dhe në Raportin e Komisionit Evropian për Kosovën për vitin 2022, progres të cilin Kancelari Scholz e ka përshëndetur

“Rritja ekonomike, sundimi i ligjit, mbështetja sociale dhe demokratizimi institucional e shoqëror kanë avancuar gjatë dy viteve të fundit,” ka theksuar kryeministri Kurti, sipas të cilit, në këtë takim është folur edhe për raportet ndërmjet Kosovës dhe Serbisë.

Në këtë takim është diskutuar edhe për përgatitjet për takimin e radhës në Bruksel, si dhe për propozimin evropian për normalizim të marrëdhënieve, sipas Kurit, të pranuar tashmë si bazë e mirë për diskutime të mëtejme dhe kornizë solide për të ecur përpara.

“Duke i falënderuar për mbështetjen e vazhdueshme dhe angazhimin e drejtpërdrejtë të Gjermanisë dhe Francës, Republika e Kosovës si vend pro-evropian dhe pro-amerikan, mbetet e përkushtuar dhe konstruktive në dialog, teksa dëshiron marrëdhënie të mira fqinjësore dhe integrim në BE dhe NATO,” ka deklaruar Kryeministri Kurti, thuhet në komunikatën e Qeverisë së Kosovës.

Gjatë pjesëmarrjes në Konferencën e Sigurisë në Muncih, Kryeministri i Kosovës, Albin Kurti, ka takuar dhe Presidenten e Bankës Evropiane për Rindërtim dhe Zhvillim, BERZH, Odile Basso, me të cilën ka biseduar për projektet që janë në zbatim e sipër me mbështetje të BERZH-it, si dhe për mundësitë e reja të bashkëpunimit.

Me këtë rast, Kryeministri Kurti ka falënderuar Presidenten e BERZH-it, Basso për mbështetjen e vazhdueshme që ky institucion i ka dhënë Kosovës ndër vite.

“Te BERZH-i Qeveria e Republikës së Kosovës sheh një partner të rëndësishëm në realizimin e qëllimeve të saj në zhvillim të qëndrueshëm, veçanërisht në fushën e transportit, digjitalizimit, energjisë dhe sektorit privat,” është shprehur Kurti ndërsa përzhvillimin ekonomik dhe demokracinë cilësore në vend ka veçuar:

“Trendin pozitiv të rritjes ekonomike në dy vitet e fundit dhe përmirësimin për 20 pozita në Indeksin e Korrupsionit të Transparency International, për 17 pozita në indeksin e Reporterëve Pa Kufi për lirinë e shtypit, dhe renditjen në vendin e parë për herë të dytë radhazi në Ballkanin Perëndimor për sa i përket sundimit të ligjit sipas Projektit të Drejtësisë Botërore”.

Kryeministri Kurti informoi Presidenten Basso edhe për aplikimin e Kosovës në Këshillin e Evropës në maj të vitit të kaluar, si dhe në Bashkimin Evropian, në dhjetor të vitit 2022.

Presidentja Basso, nga ana e saj, ka uruar kryeministrin Kurti dhe Qeverinë e Republikës së Kosovës për suksesin në luftën kundër korrupsionit. Ajo po ashtu ka shprehur përkushtimin e BERZH-it për të bërë edhe më shumë në mbështetje të Kosovës, me theks në fushën e energjisë së ripërtëritshme dhe të efiçiencës së energjisë dhe sektorin privat.

Pas takimit me Presidenten e BERZH vetë Kryeministri Albin Kurti përmes rrjetit social Twiter shprehet:  

“Kosova po ndërmerr një seri investimesh infrastrukturore të zgjuara dhe të synuara që do të krijojnë vende të reja pune dhe do të shtyjnë rritjen tonë ekonomike. Në ditën time të parë në Konferencën e Sigurisë në Munich kam takuar presidenten e Bankës Evropiane për Rindërtim dhe Zhvillim Odile Renaud Basso. E kam falënderuar për mbështetjen e saj të vazhdueshme dhe gjithashtu kemin diskutuar për bashkëpunimin në të ardhmen.”