Akili!
nga Agim Popoci
Thembra e Sali Berishës
Aromë fitoreje mungoi në prag të 14 Majit në selinë e Partisë Demokratike dhe përreth saj, dhe rezultati konfirmoi atë që çdo demokrat e ndjente jo vetëm pse bedelat e Edi Ramës nën flamurin e Lulzim Bashë luftuan kundër kandidatëve të Primareve!
Aromë lirie mungon edhe sot në selinë e Partisë Demokratike dhe përreth saj, jo vetëm pse horrat e Lulzim Bashës i vunë kazmën PD-së, dhe së fundi edhe vetes me florencat duke i dhuruar dhunë të gjthë atyre që sot kundërshtojnë rikthimin e Bashës!
Sot, për fat të keq mungon edhe aromë shprese në selinë e Partisë Demokratike dhe përreth saj, jo vetëm pse u humb edhe Shkodra më 14 maj! Grushti i optimistëve që morën përsipër ta rithemelojnë Partinë Demokratike dukshëm është tkurrur ndërsa ngushëllohen me faktin e humbjes për shkak të shitje-blerjes së votave nga regjimi; Arsye kjo që i bënë edhe më të pashpresë të gjithë demokratët e tjerë nën hundën e të cilëve kutërbon diktatura, Mjafti, Sigurimi i Shtetit dhe në kërkim të fajtorit për këtë gjendje nuk i shqiten as Sorosit!
Dhe, sot, kur kaluan më shumë se tre javë nga humbja e 14 Majit, askush nuk e ka vënë gishtin mbi plagë, por, nën zë flasin për fajtorët që bllokuan ingranazhin politik të demokratëve!
Cila është e vërteta?!
Sot, Akil Kraja është ai i cili jep leje për çdo lloj arome në selinë e Partisë Demokratike, madje edhe në kafet përreth, ata që mendojnë për të ardhmen e tyre politike, janë të kujdesshëm!
Thjeshtë, nuk është se e përkufizojnë si thembra e Sali Berishës, por ai del kudo!
Në çdo event, Akili e përcakton se kush është demokrat dhe kush jo, kush është mik i PD dhe kush jo, kush është mik i Rilindjes Demokratike dhe kush jo, madje kush është intelektual dhe kush jo!
Nuk dihet se si u emërua Drejtor i Kabinetit të PD pas rithemelimit, pasi dështoi me shumë sukses si Koordinator Kombëtar i PD nga viti i turpshëm 2015 i Lulzim Bashës!
Nuk e ka parë njeri të jetë hatëruar me Agamemnonin as me Hektorin për të cilin akuzohet se ka punuar si pjesë e Mjaftit, por, mënyra se si u kthye në luftën kundër regjimit, të bënë të dyshosh për shumë gjëra, dhe janë faktet që vulosin ca dyshime.
A ka apo jo Akili lidhje me Mjaftin, kjo nuk ndikon edhe aq shumë në thembrën e Sali Berishës, aty ku Parisi mund ta drejtoj shigjetën helmuese jo vetëm në selinë e Partisë Demokratike, ama e kaluara e Akilit, PO!
Deshti apo jo Partia Demokratike, e pranon apo jo Sali Berisha, frankofonët janë ata që i kanë shkaktuar dhe mund ti shkaktojnë shumë dëm PD-së! Pjesë e kësaj bande frankofone është dhe student Akili i Shkollës së Administratës Publike ENA, dhe Universitetit Sciences Po Paris, në Francë, ku mbaroi studimet master!
Se si do të veproi Akili në një parti të djathtë në Shqipëri natyrisht se nuk varet nga vetë ai sikur edhe të ketë qëllime të mira ndaj PD dhe Berishës, sepse kemi të bëjmë me mënyrën frankofone të menduarit dhe të punuarit, pa u futur në detajet e ndikimit dhe funksionimit të Frankofonisë.
Para se të shkel pragun e Partisë Demokratike për të na treguar se kush është demokrat dhe kush jo, Akili shihet duke menaxhuar vetëm para komunistësh! Pse?! Përgjigjen e jep edukimi i tij, i cili është dhe çelësi i punësimit si Menaxher Projektesh & PR, FedInvest, i cili ekziston vetëm fal kambizmit në kohën e diktaturës!
Kjo përvojë nga periudha 2013-2015 mund ta ketë bindur Lulzim Bashën që ta emëroj Koordinator Kombëtar i PD, por kush e bindi Gentian Sulën që ta emëroj Këshilltar të CEO në NOA.
Pse Akil Kraja u emërua nga Shoqata Shqiptare e Mikrofinancës, Sekretar i Përgjithshëm, vërtetë është më pak e rëndë se sa historia e Damian Gjiknurit, Sekretar i Përgjithshëm tek SHIK-u, sepse janë punë të Santos, por, Doktori duhet ta dijë se pse Akili u emërua nga Gentian Sula, Drejtor i Zhvillimit të Biznesit & Projekteve në NOA.
Pse Ridvan Bode u hetua nga Edi Rama për licencat e dhëna për Mikrofinanca, nuk e bënë as NOA-n as biznesmenin Gentian Sula që nuk janë hetuar, qelibar, ashtu si dhe punëtorin e tij frankofon Akilin, aq shumë merakli në paratë komuniste!
Dhe, çuditërisht, Doktori, që me tabletë në dorë skanon gjithçka online, nuk dihet se si i ka shpëtuar shkrimi i Akilit, “A mund të jetë Veliaj një ‘Macron’ shqiptar”, sa për përmbajtjen e tij, po aq edhe për kohën kur është shkruar, Mars 2019!
Të jesh Këshilltar i CEO në NOA, pronë e mikut të Kryeministrit Rama, dhe të shkruash në gazetën kryesore të Shqipërisë se “Edi Rama po përgatit tërheqjen e tij, duke e lënë në një krizë të thellë të majtën”, është shumë më e rëndë se sa parashikimi që “ashtu si Macron, Veliaj mund t’ia dalë të ndërtojë një lëvizje ‘të qendrës’ mbi një kufomë elektorale të ‘majtë’. Veliaj, me shumë gjasa, do ta vrasë PS-në, në vijim të asaj çka bëri para-ardhësi i tij.”
A ka kuptim ky lloj shkrimi, në këto rrethana?! Këtë duhet ta dijë Kryetari i PD, Sali Berisha, jo vetëm për të ruajtur thembrën e tij por dhe të Partisë Demokratike nga njeriu që ka në krah, i cili jo që nuk u qortua por pa kaluar viti atij iu besua në NOA një post shumë i rëndësishëm, Drejtor i Zhvillimit të Biznesit & Projekteve!
Si u katapultua Akili ndër radhët e Partisë Demokratike për të rithemeluar PD-në, demokratët më nuk pyesin, kishin rastin ta shohin Lulzim Bashën, i cili për koincidencë e filloi gjithashtu si Koordinator, ama nuk do t’ia lejojnë vetes të durojnë më asnjë Lul dhe asnjë Gazment të radhës; Ata votojnë, dhe votuan më 14 Maj!
A është sot Akili problemi i vetëm i rithemelimit të PD?!
Natyrisht se jo, por që është sot njëra ndër arteriet kryesore e cila ndikon në mosushqimin e zemrës dhe thembrës së Partisë Demokratike, kjo nuk diskutohet!
