Analizën për farsën zgjedhore e kemi detyrim, Berisha: Më pas, protesta të fuqishme!

Analiza në PD nuk ka filluar sepse siç po konstatoni, ne jemi çdo ditë në analizë të procesit elektoral, tha Kryetari i Partisë Demokratike, Sali Berisha, sot në fillim të konferencës së përjavshme duke sqaruar se vetëm në fund të kësaj analize do të ketë protesta të fuqishme.

Temë e pashmangshme ishte dhe Drafti i Statutit për Asociacionin e komunave me shumicë serbe, për të cilin Kryetari i PD tha se Edi Rama është në sintoni me Aleksandar Vuçiçin dhe synon ndarjen e Kosovës, por, siguroi ai, ndarja e Kosovës nuk është opsion kurrë

“Jo çdo gjë është në duart tona. Nuk është në duart tona, materialet që na duhen, janë në duart e institucioneve të shkatërrimit të zgjedhjeve, janë në duar të afateve të gjykatave. Janë një seri procesesh që kërkojnë durim dhe kohë. Por ne do i shkojmë gjer në fund.

Ne sot ju informuam se kemi paraqitur me video se si në Elbasan, në të paktën 70 përqind të qendrave, operatori ka shkatërruar votimin. Me video. Ky është rezultati kur e bën komisionin 7 me 0, kur voton fëmija 10 vjeç.

Me të mbaruar kjo analizë që e kemi detyrim absolut, përndryshe ne bëhemi bashkëfajtorë në farsën elektorale, ne legjitimojmë farsën elektorale. Ne nuk e bëjmë kurrë, nuk pajtohemi. Në mbyllje të kësaj, do jetë analiza. Me kaq seriozitet do bëjmë edhe analizën në PD dhe do ndërmarrim protestat e fuqishme për rikthimin e votës së lirë,” tha Sali Berisha ndërsa për zhvillimet e fundit në PD-në e vulës dhe mundësinë e bashkëpunimit të atyre që horrat e Lulzim Bashës i cilësuar armiq të partisë ai ishte i prerë:

“Me përjashtim të dy personave që kanë lidhje të tmerrshme krimi me Edi Ramën, me të gjithë deputetët e tjerë jam gati që kem çdo lloj debati, diskutimi dhe mirëkuptimi. Sepse ata me një akt themelor, mbështetën kandidatët e primarëve, de facto mbështetën PD-në.Këtu ata investuan në partinë që i përkasin.

Ndaj tyre, PD është plotësisht e hapur. Jo që nuk bëj një hap pas, por bëj një hap para, unë i ftoj ata që të ulen të diskutojnë, të vendosin për më të mirën për PD-në, për opozitën, për të ardhmen e vendit. Gjithçka përcaktohet nga anëtarësia e partisë. Ne kemi një statut më demokratik që mund të ketë sot. Ai Statut ka të gjitha hapësirat për çdo iniciativë të anëtarëve të saj. Unë i qëndroj me korrektesë statutit.

Nuk ndërtohet partia mbi bazën e dëshirave, por mbi bazën e rregullave, që respektojnë liritë dhe të drejtat e anëtarëve të saj. Ka dy përcaktime statusore, njërën që kur kryetari humbet zgjedhjet lokale, votëbesohet. Nuk ka përcaktim aty farsë elektorale apo jo, por zgjedhje. Dhe e dyta, po humbe zgjedhjet e përgjithshme, ai largohet.

Asnjë lloj përcaktimi tjetër jashtë kësaj, nuk i shërben PD-së dhe opozitës. Ju nuk duhet të harroni se Shqipëria është vendi në të cilin në kuptimin e mirëfilltë të fjalës, u krye një grusht shteti kundër opozitës shqiptare. Me qëllimin e vetëm, për të forcuar pushtetin mafioz të Edi Ramës dhe shkatërruar opozitën.

Kjo luftë nuk filloi me Sali Berishën, të jem i sinqertë, kjo luftë filloi që në vitin 2015 me përpjekjet më të paimagjinueshme për ta përjashtuar opozitën nga të gjitha proceset kryesore në mënyrat më diabolike.
Vazhdoi me kontraktimin e McGonigalit në një kohë kur ishte në detyrë, me angazhimin e Lou Bladel, Marko Rossinit, me ndikimin e fuqishëm të George Soros, Aleksit, etj.

Të gjitha këto janë përpjekje për shkatërrimin e opozitës shqiptare. Ju nuk e harroni kur Lulzim Basha, i akuzuar nga SHBA për financime ruse, përfaqësuesi i asaj qeverie, bënte gjithçka për ta mbajtur në krye të PD. Sepse ai është pengu i Edi Ramës. Mënyra më efiçiente për të shkatërruar një komb është të shkatërrosh opozitën.

Në fund, për Draftin e Asociacionit e komunave me shumicë serbe të cilin Kryeministri Edi Rama e bëri dje publik dhe tha se i kishte dërguar Presidentit Macron, Kancelarit Scholz dhe Këshillit Evropian por nuk e kishte kontaktuar fare Kryeministrin e Kosovës Albin Kurti, Kryetari i Partisë Demoratike tha se Rama është në sintoni me Vuçiçin.

“As që e kam lexuar dhe nuk kam asnjë interes.

Unë u them atyre që përpiqen të përdorin Ramën, vetëm sa komplikoni zgjidhjen e problemit.

Çështja e Asociacionit nuk është çështje drafti.

Draftin e Ramës, sigurisht e ka shkruar Vuçiçi. Kjo është për t’i thënë Albin Kurtit, që ti as këtë që ka hartuar Tirana, nuk e pranon. Kjo është një thikë pas shpine, që Aleksandër Vuçiç, doktrinari i gjenocidit, arrin t’i fusë Kosovës përmes vasalit të vet, Edi Rama. Nuk është asgjë tjetër, Brukseli, Washingtoni, Londra, Parisi, Berlini kanë grupet më të shkëlqyera të ekspertëve, por për hir të së vërtetës, ai draft duhet të hartohet nga ata që do e zbatojnë.

Futja e Edi Ramës në mes, ishte vetëm për t’i futur një thikë, siç bëri me hartat. Kush vraponte me hartat e ndarjes së Kosovës dhe kufijve? Iniciatori i atij projekti, rezulton sipas burimeve shumë serioze të jetë Edi Rama, pra të jetë Vuçiçi përmes argatit të tij,” tha Kryetari i Partisë Demokratike, Sali Berisha, duke përfunduar:

“Me këtë rast, mund të them se nëse procesi i negociatave midis Kosovës dhe Serbisë eci brenda dy vitesh me një kurs të pandalshëm, që nga viti 2013 është shndërruar në pëlhurë të Penelopës.

Ky, në sintoni me Vuçiçin, synon ndarjen e Kosovës. Por ndarja e Kosovës nuk është opsion kurrë. Ndaj Edi Ramës i ra maska, Kosova bëri reagimin e vet në union.”