Vuçiç me Dodikun: Do të organizohet një takim i të gjitha “autoriteteve shtetërore” të Serbisë dhe RS

Presidenti serb, Aleksandar Vuçiç tha pas një takimi me Milorad Dodikn, presidentin e entitetit serb të Bosnje Hercegovinës, Republika Srpska, që janë pajtuar për organizim të shpejtë të një takimi të “të gjitha autoriteteve shtetërore” të Serbisë dhe Republikës Srpska.

Sipas tij, raporton RFE, takimi do të mbahet në territorin e Republikës Srpska në Bosnje.

“E kam dëgjuar presidentin Dodik me vëmendje të madhe, lidhur me të gjitha zhvillimet në Republikën Srpska dhe në Bosnje Hercegovinë dhe jemi pajtuar që ta organizojmë një takim të të gjithë trupave shtetërore të Serbisë dhe Republikës Srpska, në territorin e kësaj republike, sa më shpejt që është e mundur,” thekson sot Vuçiç përmes një postimi në rrjetin social Instagram.

Çfarë i ka paraprirë takimit?

Takimi në mes të Dodikut dhe Vuçiçit zhvillohet në kohën e rritjes së kritikave të faktorit ndërkombëtar ndaj Dodikut, kryesisht për shkak të deklaratave dhe veprimeve të institucioneve të këtij entitetit, që konsiderohen destabilizuese për shtetin e Bosnje Hercegovinës.

Së fundi, Qeveria e Republikës Srpska ka miratuar ligje për moszbatimin e vendimeve të Gjykatës Kushtetuese të Bosnjes dhe që të mos i publikojë vendimet e Përfaqësuesit të Lartë të bashkësisë ndërkombëtare.

Që deklaratat e Dodikut janë kundër perspektivës së anëtarësimit të Bosnje-Hercegovinës në Bashkimin Evropian, e ka thënë të mërkurën edhe kryediplomati i BE-së, Josep Borrell.

“Akti i largimit prej rendit kushtetues duhet të ndalet. Retorika përçarëse, kërcënimet për ndarje, kërcënimet ndaj integritetit territorial dhe madhërimi i kriminelëve të luftës duhet të ndalet, sepse nuk ka vend për diçka të tillë në Evropë,” tha Borrelli në takimin e pestë të Këshillit për Stabilizim Asociim, Bosnje-BE.

Veprimet e Dodikut i ka kritikuar edhe i dërguari amerikan për Ballkanin Perëndimor, Gabriel Escobar, në një dëshmi të dhënë para anëtarëve të Komitetit të Dhomës së Përfaqësuesve për Marrëdhënie me Jashtë, më 18 korrik.

“Veprimet e vazhdueshme, përçarëse dhe jodemokratike kërcënojnë stabilitetin, sigurinë dhe prosperitetin e shtetit dhe gjithë rajonit,” tha ai.

Prej shpërthimit të krizës së fundit në Bosnje, raporton RFE, presidenti Vuçiç kryesisht ka qëndruar anash, duke thënë se nuk dëshiron t’i komentojë zhvillimet atje.