Polumbarët, Kosovarët nuk janë të përgatitur për plazh

Me fillimin e sezonit turistik përveç turistëve, në bregdetin shqiptar janë shtuar edhe rastet e atyre që kanë humbur jetën në det.

Ditë më parë është raportuar edhe për viktima, e fajtori është gjetur tek mungesa e vrojtuesve në shumicën e plazheve shqiptare.

Në vendet, të cilat janë të destinuara për rojet bregdetare, shihen duke lozur fëmijët.

Për këtë situatë polumbari nga Kosova, Ismail Kasumi ka një porosi.

“Shqipërisë i ka fal Zoti 450 kilometra bregdet. Mirëpo fatkeqësisht askund në plazhe nuk e kanë të precizuar deri ku duhet të shkojnë notuesit. Pastaj në plazhet e tyre nuk e sheh askund vrojtuesit, ku këta të fundit në rast se e hasin rrezikun i lajmërojnë notuesit”, tha Ismail Kasumi për TV Dukagjinin.

Se kosovarët nuk janë shumë të përgatitur për not e thonë edhe në pishinën më të madhe në kryeqytetin e Kosovës.

“Thënë realitetin, mbi 50 për qind e vizitorëve nuk e dinë notin. Këtë e vërejmë në shpëtimtarët, pasi në pjesën ku lahen fëmijët shohim shumë të rritur, e kjo nënkupton se ata nuk e dinë notin. Faktikisht prindi është i obliguar që fëmijës deri në 10 vjet t’ia mësojë notin, por kjo mosdije e tyre është diçka e keqe”, tha Shefqet Hasani, polumbar dhe shpëtimtar në Pishinën e Gërmisë duke shtuar se përkundër faktit që ka pak kohë që është funksionalizuar kjo pishinë, ka pasur raste kur është dashur të ndërhyjnë.