Takim me Ish-Komandantin e Wagner, Putin: Tani punon për mua!

Presidenti i Rusisë, Vladimir Putin, në takim me Ish-Komandantin e grupit terrorist rus Wagner, Andrej Troshev, ka diskutuar për mundësinë e inkuadrimit të njësiteve vullnetare në luftën e Ukrainës, ndërsa Kremlini tha se ky mercenar tani punon në Ministrinë e Mbrojtjes.

Duke ju drejtuar Troshevit, Putin tha se kanë biseduar se si “njësitet vullnetare mund të kryejnë detyra të ndryshme luftarake, para së gjithash, në zonën e operacionit special”.

“Ju edhe vetë keni luftuar në njësi të këtij lloji më shumë se një vit. E dini se çfarë është, cilat çështje duhet zgjidhur paraprakisht në mënyrë që përpjekjet luftarake të kalojnë me sukses sa më të madh,” tha Putin.

Ndërsa zëdhënësi i Kremlinit, Dmitrij Peskov, tha për Agjensinë ruse të lajmeve RIA se Troshev tani punon për Ministrinë e Mbrojtjes të Rusisë. 

Ndryshe, Andrej Troshev është nga Shën Petersbugu, që është dhe vendlindja e Vladimir Putinit, veteran i luftërave në Afganistan dhe Çeçeni ndërsa me shpërbërjen e BRSS ka shërbyer në njësitet speciale të ushtrisë ruse për ndërhyrje të shpejtë.