Senati i Kunetërve, shpëtimi i PD!
nga Agim Popoci
Tranzicioni politik shqiptar nën përpjekjet e vazhdueshme të Sigurimit të Shtetit për ta futur nën kontroll absolut, ka prodhuar shumë të papritura, që si të tilla janë shoqëruar dhe me zgjidhje që nuk përkojnë me realitetin shqiptar!
Sa herë që janë krijuar konflikte brenda një partie zgjidhja është munduar të importohet nga jashtë pa u analizuar rrethanat e krijimit të krizës, ndërkohë lidershipi i partive nuk ka arritur të prodhoj asnjë pasardhës besnik që do ta ndiqte vijimësinë e linjës partiake dhe ideologjike!
Situatë e ngjashme u krijua edhe në institucione shtetërore dhe problem ishte dhe ngeli tempulli i ligjeve, aty ku mazhorancat politike nuk janë munduar të shtojnë numrat e tyre, por, ta përçajnë rivalin politik!
Një luftë e tillë politike ka shkaktuar dhe krizën e radhës në Partinë Demokratike, që u përkeqësua me praninë e amatorëve të importuar politikë në krye të partisë, implikimin e Kryeministrit Edi Rama dhe rolin e padiskutueshëm të Sigurimit të Shtetit!
Deri sa më parë e gjithë kriza krijohej duke sajuar konfliktin ndër breza dhe si kryefjalë gjithmonë mbivendosej si propozim një Senat i cili do t’ju mbyllte gojën të moshuarve, të cilëve temperamenti nuk u kishte kalcifikuar personalitetin e tyre ndër anëtarët e partisë, por, kishte kontribuar në krijimin e një lideri të pazëvendësueshëm, sot situata i doli jashtë kontrollit edhe vetë Edi Ramës që e krijoi!
Sot, kur Partia Demokratike është në prag të shkërmoqjes, kur Lulzim Basha me 7 deputetët e tij bënë ligjin me vulën fal Edi Ramës, duke e lënë të shtypur, të përbuzur derisa edhe të ndëshkuar nga SHBA liderin real të PD, Sali Berisha, falë korruptimit të strukturave të FBI nga Kryeministri i Shqipërisë, situatën nuk e ndihmon më as Senati i cili do të kishte vend për të gjithë “pleqtë e partisë” për të cilët edhe mund të rezervohej një vendimmarrje qoftë dhe e rëndësishme!
Sot, kur vendimet i merr Kunati dhe jo Lulzim Basha, ai që dje krijonte aleanca ndërtuesish dhe shiste leje ndërtimi kur të gjithë mbyllnin gojën, emëronte dhe nuk lejonte zgjedhjen e Sekretarit të Përgjithshëm, Kryetarin e Forumit Rinor ashtu si dhe listat e deputetëve duke mbuluar pisllëqet me damkën “njerëzit e Saliut”, pse duhet besuar akuzat e këtyre njerëzve se Lulzim Basha po shet partinë, vetëm pasi u kuptua se Kunati i kishte dhënë urdhër Bashës që ti vënë vizën edhe ca zvarranikëve që iu shërbyen deri dje!
Sot, kur Partia Demokratike është nga fundi i procesit të shkërmoqjes, anëtarësia nuk mund të bashkohet pasi të jetë informuar se cila është pasuria e përfituar me menaxhimin e PD nga Kunati!
Kjo do të ishte shumë më e tmerrshme se sa gjyqi publik që i bëhet aferës së inceneratorëve prej 430 milionë eurove, dhe që ka filluar të konvertohet me vite burgu por jo dhe gjetjen e këtyre parave që u dhanë nga buxheti i shtetit!
Sepse denoncimi i fundit i Kyetarit të Grupit Parlamentar të PD, Gazment Bardhi, deri dje dora e djathtë, e majtë dhe e mesit, e Kryetarit të PD, Lulzim Basha, se pas humbjes së zgjedhjeve Basha kishte blerë dy katet e pallatit në Rezidencën Lion Park në Tiranë, shpërtheu me detajet e publikuara nga mediat se kjo blerje me vlerë dhjetëra milionë euro ishte blerë 5.6 milionë euro nga Kunati, dhe e gjitha u mbyllë këtu! Kontratat dhe bilancet e kompanive të Kunatit që nuk arsyetonin shumën e parave që ishin blerë dy katet ishin të kota, pasi SPAK tashmë kishte marrë urdhër që të mos lëviz!
Por, heshtja e SPAK-ut, nuk nënkupton dhe mosveprimin e PD-së!
PD nuk duhet të rrijë dhe pres gruan e Lulzim Bashës t’ju jep urdhër, siç vepronte me ish-liderin e tyre para syrit të Instagramit në guzhinë, as t’i shkojë ndërmend për ta degdisur Sali Berishën me të ngjashmit me një Senat të pelqëve; Dhe, pa u larguar nga Senati, të krijohet një Senat i Kunetërve të lidershipit të Partisë Demokratike, që është dhe çelësi i gjithë kësaj drame!
Përveç moslejimin e shkërmoqjes, Senati i Kunetërve do ta frenonte Kunatin më delirant në Shqipëri, dhe pasi që ata në mes vete do të konstatonin se kunetër janë por si ai i Lulzim Bashës nuk ka të ngjashëm në botë, do të vendosnin për kuotën e themelimit të një Fondacioni i cili do të kujdesej për financat e partisë!
Kush do ta financonte?! Të gjithë Kunetërit e lidershipit demokrat që u pasuruan nga Partia Demokratike do të kujdeseshin për këtë formulë që më nuk do të jetë magjike ndonëse për të gjithë tashmë është e qartë se kontribuuesi më i madh që ju mbushi xhepat është: Kryeministri Edi Rama!
Në fund, Senati i Kunetërve për të shpëtuar PD-në, a nuk është kjo një tallje shumë e rëndë për shqiptarët në vitin 2023?!
Tallje është, por, jo më rëndë se sa pesha e pasurisë që rëndon në një trup me intelekt si Kunati!
