Proces politik, Berisha: Edi Ram i ka shpallur luftë opozitës!

Duke e konsideruar procesin gjyqësor kundër tij si proces ku nuk është vetëm Sali Berisha dhe familjarët e tij, Kryetari i Partisë Demokratike vlerëson se Edi Rama i ka shpallur luftë opozitës për të cilën PD do i përgjigjet me të gjitha forcat dhe mundësitë.

“Siç e dini, Edi Rama i ka shpallur luftë opozitës dhe unë u them demokratëve kudo që janë, se me aktin e fundit, ai ka shpallur një luftë totale, për të cilën ne do i përgjigjemi me të gjithë forcën dhe mundësitë tona.

Procesi është procesi më politik i këtij shekulli,” thekson Sali Berisha duke saktësuar se në proces nuk është vetëm Sali Berisha dhe familjarët e tij ndërsa përfundon.

“Në proces janë reformat epokale të PD-së, të cilat goditen nga një gardë pretoriane, të cilat goditen nga falanga politike krimi, në një analizë që dëshmon urrejtjen e tyre për reformat e tregut të lirë dhe demokracisë që ka ndërmarrë PD në vite. Çdo demokrat duhet të ndjehet krenar me to,” tha Sali Berisha duke i thënë demokratëve se janë në luftë dhe opozita do qëndrojë me të gjitha mundësitë e saj.

“E turpshme, e pacipë, mercenarë të ligjit bëjnë pretenca ndaj reformave të thella.

Nuk ndodh kurrë kjo.

Legjislativi është legjislativ dhe nuk mundet kurrë një gjykatës të shpifë dhe të trillojë në atë mënyrë.

U dëmtua sporti, thotë. Po si u dëmtua sporti, kur në ligj thuhet se terrenet sportive do privatizohen me kusht që pronari t’i destinojë për aktivitet sportiv? Si dëmtohet sporti?

Ndërkohë që ato ishin të pushtuara nga parolaçër e të tjerë, ishin pronarë e pronarëve, qytetarët nuk përfitonin një qindarkë prej tyre.

Ne besuam se ajo ishte rruga për të mbështetur sportin. Dhe pronari nuk e përfitonte nëse nuk garantonte se kjo do përdorej,” tha lideri i opozitës duke shtuar se nuk është problemi këtu i individit, problemi është aktakuzë e mirëfilltë politike ndaj reformave.

“Por PD nuk heq dorë nga asgjë nga programi i saj. Ndjehet i nderuar për çdo vendim, akt dhe ligj që është miratuar në periudhën e qeverisjes së PD dhe aleatëve.

Të gjesh gjykatës që i lejojnë vetes të shpifë dhe manipulojë për ligjet e miratuara në parlament, kjo ndodh vetëm në këtë regjim.

Kjo nuk na dekurajon ne, ne mbetemi parti reformash.

U them demokratëve se ne jemi në luftë. Edi Rama i ka shpallur luftë opozitës dhe opozita do qëndrojë me të gjitha mundësitë e saj.”

Në fund, duke konstatuar se Edi Rama dhe skapistët po bëjnë gjyqin e reformave të suksesshme të Partisë Demokratike, Kryetari i PD, Sali Berisha, nuk përjashtoi dhe mundësinë e protestave.

“Asnjë gjë nuk është jashtë tavolinës.

Të gjitha janë në tryezë.

Ne, siç e shihni, kemi të bëjmë me një proces monstruoz politik. Kur Edi Rama, me dy skapistë dhe një tjetër, vënë në tryezë reformat e suksesshme, sepse ajo ekonomi, për dijeninë tuaj, atë vit që janë emetuar bonot, jo për shkak të bonove, ka pasur një rritje prej 8.3 përqind sipas institucioneve ndërkombëtare.
U them atyre që kapin penën dhe shpifin duke cituar dacibaon e prokurorisë, vetëm sa baltosni moralin tuaj sepse një gazetar është i detyruar që të paraqesë, nëse i intereson e vërteta, të dy variantet. Të dy palët.

Krijojnë narrativa nga më primitivet, ky djalosh me 113 metër katror, doli me 5.2 milionë euro. Gjithçka e bazuar në shpifje, gjithçka e bazuar në turpin e fshehjes së dokumenteve. Gjithçka e bazuar në manipulimin e dokumenteve.

Se një djalosh tjetër, në të njëjtat kushte, absolutisht mund të dilte të paktën edhe 20 përqind më shumë. Por ky zgjodhi atë rrugë. Kaq!”

Ndryshe, në vitin 2020 kreu i Grupit Parlamentar të PS sot ministër i Brendshëm, Taulant Balla, ka paditur, Ish-Kryeministrin Sali Berisha, Ish-Ministrin e  Mbrojtjes, Arben Imami, dhe anëtarë të tjerë të qeverisë së drejtuar nga Berisha, Jamarbër Malltezi si përfitues direkt i kësaj prone si dhe drejtues të shtabit të ushtrisë shqiptare bashkë me administratorët dhe aksionerët e dy kompanive ndërtuese në kompleksin “Partizani”.

Gjykata e Posaçme e Shkallës së Parë për Korrupsionin dhe Krimin e Organizuar, GJKKO, ka vendosur ndaj Kryetarit të PD Sali Berisha, masën e sigurisë “detyrim paraqitje”, si dhe iu bllokua pasaporta ndërsa ndaj Jamarbër Malltezit masa “arrest me burg” me akuzën për korrupsion, pastrim parash dhe fshehje e deklarim të rremë të pasurisë. Ndërsa ndërtuesit Fatmir Bektashi, i përfshirë në ndërtimet e pallateve në zonën ku ndodhej kompleksi sportiv Partizani i është caktuar masa “detyrim paraqitje”.