Izraeli refuzon ndërprerjen e zjarrit, kërkon dorëheqjen e Sekretarit Përgjithshëm të OKB
Izraeli ka refuzuar thirrjet e bashkësisë ndërkombëtare për ndërprerjen e zjarrit dhe sërish ka premtuar se do të shkatërroj Hamasin.
Kombet e Bashkuara, palestinezët dhe disa shtete e kanë bërë kërkesën në takimin e OKB të nivelit të lartë, por ministri izraelit i punëve të jashtme tha se është e drejtë e vendit që ta shkatërroj Hamasin.
Shefi izraelit i diplomacisë, Eli Cohen, gjithashtu ka hedhur poshtë thirrjet për “proporcionalitet” në përgjigje të vendit ndaj sulmeve të papritura të Hamasit ndaj Izraelit më 7 tetor.
“Më thuani cila është përgjigja proporcionale për vrasjen e bebeve, përdhunimin e grave dhe djegien e tyre, prerjen e kokave të fëmijëve? Si mund ta pranosh ndërprerjen e zjarrit me dikë që është betuar se do të vras dhe shkatërroj ekzistimin e vet?” pyeti Cohen.
Ai i tha Këshillit të Sigurimit të OKB se përgjigja proporcionale ndaj masakrës ishte “shkatërrimi i plotë deri në hamasistin e fundit”, duke e quajtur këtë grup ekstremist “nazist të rinjë”.
“Nuk është vetë e drejta e Izraelit që ta shkatërroj Hamasin. Ky është detyrimi jonë,” tha ministri i Jashtëm i Izraelit, Eli Cohen.
Në sulmin ndaj Hamasit u vranë 1.400 njerëz, ndërsa gjatë aksioneve izraelite që pasuan u vranë mbi 5.700 palestinezë në Rripin e Gazës, ka bërë të ditur ministria e Shëndetësisë.
Ndërkohë zëdhënësi i ministrisë së Jashtme të Izraelit tha për BBC News se Sekretari i Përgjithshëm i OKB-së, Antonio Guterres, duhet të japë dorëheqjen për komentet që ai bëri gjatë fjalimit të tij.
Në fjalimin e tij duke pretenduar shkelje të ligjit ndërkombëtar humanitar, Gutteres tha: “Është e rëndësishme të pranohet gjithashtu se sulmet nga Hamasi nuk ndodhën në vakum. Populli palestinez i është nënshtruar pushtimit mbytës për 56 vjet”.
“Por ankesat e popullit palestinez nuk mund të justifikojnë sulmet e tmerrshme të Hamasit. Dhe këto sulme të tmerrshme nuk mund të justifikojnë ndëshkimin kolektiv të popullit palestinez, “tha ai. Duke folur për BBC Radio 4, The World Tonight, zëdhënësi I qeverisë së izraelit Lior Haiat tha se fjalimi i shefit të OKB-së përmbante vetëm “një minutë me fjalë boshe për mizoritë e terroristëve të Hamasit” dhe jepte “justifikim për terrorizmin”.
“Në vend që të qëndrojë me viktimat, ai fajëson viktimat për një mizori që ne nuk e kemi parë të tillë që nga Holokausti,” vazhdoi ai.
“Në vend që të qëndrojë me mesazhin ‘Kurrë më’, ai në fakt po u thotë terroristëve “Kjo ju lejohet ta bëni, ne e pranojmë terrorizmin tuaj brutal sepse fajin e ka Izraeli”.
