Qeveria dështoi, Edi Rama dhuratë vetëm për Blendi Gonxhen: Ministër i Ekonomisë, Kulturës dhe Inovacionit!
Me përfundimin e festave të fundvitit, Edi Rama vajti në Kryeministri ku dhe u kujtua për thesin e tij nga i cili nuk nxori asnjë dhuratë për ministrat e kabinetit që drejton! E kush më shumë se miku i tij i vjetër nga përmbytjet e Selitës, që sot si Drejtor i Përgjithshëm i Drejtorisë së Përgjithshme të Shërbimeve të Transportit Rrugor e meriton një dhuratë, që do të quhej dhe ndryshim në qeveri, si dhe do të komentohet nga ana tjetër për disa ditë edhe si zgjidhje epike: Nga dy ministri të dështuara, i varë në qafë Blendi Gonxhes ministrinë e Ekonomisë, Kulturës dhe Inovacionit, duke i dhënë timonin e tepsinë, vetëm përpara!
“Lipset të kalohet sot në një qasje të integruar qeveritare në raport me sektorët e Ekonomisë, Kulturës dhe Inovacionit, të cilat për fazën e re të zhvillimit ku sapo kemi hyrë, duhet të dalin nga kufijtë e ngushtë tradicionalë të qeverisjes së vendit dhe të ndërveprojnë ngushtësisht me njëra-tjetrën, sidomos në kushtet kur teknologjia digjitale ka hyrë si një fuqi e re e kohës në të gjitha fushat e jetës dhe kërkon drejtim strategjik, orientim qeverisës e koordinim ndërsektorial; kur kultura nuk mund të mbetet më një ishull i vogël e i ndarë nga dinamikat e reja ekonomike e sociale të vendit, mbi të cilat ajo ka një potencial të madh ndikues, e prej të cilave ajo mund të përfitojë shumë më tepër; kur vetë sektori i ekonomisë në tërësi kërkon një përmasë të re në frontin e qeverisjes,” shprehet Edi Rama përmes rrjetit social X duke dhënë me këtë fjalor të pakuptimtë sikur Fatos Nano, shenjat e fundit të kazanit të pushtetit.
Por, gaztori nuk e përfundon këtë kumt pa treguar se ka strategji, ndryshim të strukturës së qeverisë, dhe krijim të një ministrie të re, duke përfunduar me gazin e botës se ky edhe i propozon Presidentit, të cilin e pjelli, e rriti dhe tani po e tall pa mëshirë.
“Për këtë nevojë strategjike të kësaj faze të re të zhvillimit, kam vendosur ndryshimin e strukturës së qeverisë dhe krijimin e një ministrie të re të Ekonomisë, Kulturës dhe Inovacionit, e cila do të bashkojë në një të vetme pjesët që aktualisht funksionojnë të ndara në ministritë respektive të Financave dhe Ekonomisë e të Kulturës,” tha Kryeministri i Shkodrës, Himarës dhe gjithë Shqipërisë, Edi Rama, duke përfunduar dhe me publikimin e këtij propozimi:
“Për drejtimin e kësaj ministrie të re do t’i propozoj sot Presidentit të Republikës, zotin Blendi Gonxhe, një drejtues publik që ka spikatur për reformimin dhe modernizimin mbresëlënës të institucionit, orientimin konstant ndaj inovacionit në funksion të rritjes së cilësisë së shërbimit për qytetarët, shpejtësinë e integrimit të nënsektorit përkatës në kornizën e standarteve europiane.”
