Emergjencë Kombëtare, Ministri për Marrëdhënie me FBI!
Sot kur Ekuadori është në kaos pasi shteti i ka shpallur luftë mafies dhe pritet ekstradimi i të burgosurve të huaj dhe transferimi i bosëve të trafikut të drogës në burgjet e sigurisë maksimale, ndër të cilët edhe shumë shqiptarë të përfolur që konteinerët e bananeve me kokainë drejt Shqipërisë përkatësisht Evropës i shndërruan në konteinerë të kokainës me banane, edhe shteti shqiptar është në kaos, por, nga propaganda që shet Kryeministri Edi Rama dhe Prokuroria e Posaçme, SPAK, në media!
Çfarë po ndodhë…
Bindjen e shqiptarëve se SPAK është krijesë e amerikanëve, Kryeministri i Shkodrës, Himarës dhe gjithë Shqipërisë, Edi Rama, e rrëzoi nga majat më të larta të partisë së tij socialiste, PS, dhe e konfirmoi me veprimet e kësaj e Prokurorie të Posaçme, ku sipas grafikut dhe për shmangie të statistikës negative, çdo ministër ose zyrtar i lartë arrestohej vetëm pas dorëheqjes së dhënë, ashtu siç vdesin në QSUT dhe Spitalin e Traumës, pacientët e Spitalit që blenë Spitale!
Këtë agresivitet të Kryeministrit që prodhoi reagim shumë negativ u munduan ta kurojnë mediat që ka në shërbim Edi Rama, por nisja e rigjykimeve të shumëta me ministrat e Saliut krijoi konfuzion shumë më të madh rreth spermatozoidit që krijoi SPAK-un, dhe, rolin që sot ai ka!
Askush përveç Edi Ramës nuk mund ta vë në dyshim kontributin e pamohueshëm të SHBA dhe konkretisht FBI në krijimin e SPAK dhe Byros Kombëtare të Hetimit, BKH; Por, askush sërish përveç Edi Ramës nuk e thotë se kontributin e pamohueshëm nuk e kanë Shtetet e Bashkuara por Partia Socialiste!
Nëse qenka Partia Socialiste ajo që krijoi SPAK-un opozita kot e akuzon këtë strukturë të posaçme sepse PS është ajo që duhet të sqaroj pse asnjë ministër i Edi Ramës nuk u arrestua në detyrë!
Pa i përfshirë këtu akuzat e opozitës, nëse përgjigjen për këtë enigmë nuk e ka as kreu i SPAK-ut, Altin Dumani, që u zotua se do ta luftoj korrupsionin, dhe, që të gjithë ministrat pa dallim së bashku me zyrtarët e prangosur në dosjen e tyre figurojnë si “ish”, atëherë enigma e rradhës është pse për dy proceset madhore të përcjellura me tam-tame mediatike dhe të inicuara nga njerëzit e po kësaj qeverie, “Gërdeci” dhe “21 Janari”, sapo rifillojnë rezulton se zgjidhjen e çelësit e ka në dorë FBI!
Që ky kaos të jetë më kompleks, ndërsa familjarët e njerëzve që kanë humbur jetën në “Gërdec” dhe “21 Janar” presin përgjigje nga FBI, informohen se ndaj një zyrtari të lartë të FBI po bëhet gjyqi në New York sepse qenka korruptuar nga Ministri i Energjetikës, Damian Gjiknuri, dhe, Kryeministri Edi Rama!
Në këtë situatë, kur shteti ka dha drejtësinë në kaos edhe pse u ndërmor Reforma rrënjësore, ku edhe Fondi Monetar Ndërkombëtar në rishikimin e Artikullit IV të konsultimeve me Shqipërinë thekson se ndërsa vendi është në rrugën e anëtarësimit në BE, autoritetet po përballen me disa pengesa që ndikojnë produktivitetin dhe arritjen e standardeve më të larta të jetesës, ku përfshijnë informalitetin e përhapur, dobësitë në qeverisje dhe sundim të ligjit, rezulton se askush nuk kërkon zgjidhje; Madje edhe ato që Kryeministri Edi Rama i quan ndryshime në qeveri me krijimin e dy ministrive të reja Ministrinë e Ekonomisë, Kulturës dhe Inovacionit, dhe, Ministrinë e shtetit për Administratën Publike dhe Antikorrupsionin, vetëm përmirësimit të situatës nuk i shërbejnë!
Ministri për Marrëdhënie me FBI
Për t’u sqaruar që në krye të herës, ideja për krijimin e Ministrisë për Marrëdhënie me FBI-në nuk ka të bëjë me sarkazëm rreth Ministrisë për Marrëdhënie me Parlamentin, që e bëri të vdekur për pak muaj këtë institucion pa opozitë dhe me mazhorancë, që i shqyen dhe i qep rregulloren opozitës se si duhet të sillet dhe si duhet ta kërkoj Komisionin Hetimor, por, është një ide praktike për daljen nga ky kaos që e solli vetëm politika!
“Është e udhës që politikat antikorrupsion të qeverisë të harmonizohen më mirë mes institucioneve të ekzekutivit, me ekzigjencat e procesit sfidues të negociatave me BE për të gjitha institucionet e vendit, si edhe me vetë shoqërinë civile e sipërmarrjen,” tha Edi Rama kur bëri të ditur se po krijohet Ministria e shtetit për Administratën Publike dhe Antikorrupsionin, por, për të mos u çuditur si sot në përurimin e hapjes së “Shtëpisë së Biznesit” kur e din se ekziston platforma e-Albania dhe prapë se prapë, ka një pjesë tjetër të kësaj bote të vjetër të ryshfetit që është akoma gjallë, Kryeministrit duhet ti thotë dikush se politikat antikorrupsion të qeverisë nuk ka nevojë të harmonizohen më mirë mes institucioneve të ekzekutivit, ndryshe do të arrestoheshin ministra e zv.kryeministra dhe jo ish-ministra e zv/kryeministra, madje këtij të fundit iu ndezë llampa edhe për të ikur jashtë shtetit!
Cili do të ishte përfitimi i shqiptarëve nga Ministria për Marrëdhënie me FBI?!
Fillimisht si FBI ashtu dhe shqiptarët do të qetësohen më në fund se ky institucion mund të korruptohet nga zyrtarët shqiptarë ose do përgojohet se damkën “non grata” e kanë nxjerrë në pazar, kur i dihet buxheti i Ministrisë me zërat e qartë.
Ministria për Marrëdhënie me FBI më në fund do të mbyllë edhe historitë e fajtorëve të “21 Janarit” dhe “Gërdecit” në mënyrë që të mos manipulohet as me të vdekurit dhe as me familjarët! Nëse njerëzit e kësaj Ministrie do të bëjnë dhe përpjekje për të qepur intrigat e dala nga goja e Edi Ramës dhe Taulant Ballës lidhur me këto dy çështje, do të jetë pala tjetër që do ta ruaj imazhin e saj, ose më saktë, ta shpëlaj imazhin që Charles McGonigal i bëri pis!
Derisa “21 Janari” është më i thjeshtë për tu zbërthyer dhe FBI do të zbardhë gjithçka që di rreth hetimeve të kësaj ngjarje, “Gërdeci” ka shumë elementë të Sigurisë Kombëtare të SHBA që e bëjnë atë një çështje me të cilën vetëm idiotët ose më saktë, komunistët, mund të manipulojnë!
Ministria për Marrëdhënie me FBI edhe për mburrje, mund të flas për kontributin dhe arritjet e saj në rolin e FBI për ngritjen e kapaciteteve në SPAK dhe BKH, që do të bënte nul njëherë e mirë dhe rolin e Partisë Socialiste në këtë ecje vetëm përpara!
Në fund, pavarësisht shpikjeve të Edi Ramës përmes kadiut Ermonela Felaj, zëri i kreut të Ministrisë për Marrëdhënie me FBI do të dëgjohej të paktën në interpelancë. Nëse truri Rama-Felaj do ta mbyllnin edhe këtë frengji, atëherë kulla Shqipëri, nuk ka arsye të thuhet se, EKZISTON!
