M’fal Ambrozia Meta!
nga Agim Popoci
“Në Portin e Durrësit nuk ka investim, po shiten pallatet në gropë…” ishte pyetja që acaroi Edi Ramën jo si Kryeministër i Shkodrës, Himarës dhe gjithë Shqipërisë, por si dhunues në detyrë qysh se kur shkeli në politikë!
Legjendat urbane mbi Edi Ramën dhunues të femrave filluan të dëgjohen që nga momenti kur e luajti kartën morale me rivalin e tij për kryetar të bashkisë, Besnik Mustafaj, kartë të cilës vetë i vuri flakën i bindur se tashmë nuk ka media që do ti kundërvihet!
Për fat të keq këtu kishte të drejtë, dhe kjo u pa që në fyerjen e parë publike që i bëri një gazetareje të një televizioni opozitar, dhe ndonëse i sugjeroi të punoj më mirë në semafor, asnjë media nuk e dha lajmin, e largqoftë të reagoi!
Shpërthime të tilla të këtij dhunuesi të përsëritur, shqiptarët arritën ti shohin në shumë raste, madje në këtë shoqëri të dalë nga dhuna e diktatorit Enver Hoxha u arrit që edhe i çmenduri i parë i Bashkisë Tiranë me sëpatë në dorë, të cilësohet “macho man”!
Dhe, nga semafori deri te shpulla në faqen e një gazetareje nuk na ndanë një det, por, një dhunë e tërë, ku mediat heshtën ndërsa shqiptarët e vlerësuan situatën duke iu referuar mediave që i servirin lajme në këtë shoqëri jodemokratike!
Kur mediat ndërkombëtare dhe shoqatat për mbrojtjen e gazetarëve reaguan, Edi Rama reagoi, jo për të reflektuar por për të na treguar se as që e ka mendjen të kërkoj ndjesë!
Edhe këtu duhet pranuar se Edi Rama ka të drejtë! Pse duhet të kërkoj ndjesë kur shqiptarët heshtën dhe gjetën dhe arsyet pse u dhunua gazetarja Ambrozia Meta!
Madje heshtën edhe kur Kryedhunuesi i Shkodrës, Himarës dhe gjithë Shqipërisë, i dha të drejtë vetes të quhet ish-pionier i shtypit të lirë të Shqipërisë, madje thotë ai se për shkak të fjalës së lirë iu rrezikua jeta, dhe asnjëra prej këtyre pohimeve nuk qëndrojnë!
Heshtën dhe shoqatat për të drejtat e gruas që edhe në këtë rast si gjatë gjithë këtij tranzicioni të përçudnuar, bënë me devotshmëri atë që e qajnë me lot, thithjen e fondeve ndërkombëtare, dhe nuk panë arsye të dënojnë as dhunën që e pa gjithë dynjaja “live”, por, u mjaftuan me vlerësimin e Kryeministrit: “Ledhatim”!
Ndërsa gazetarja Ambrozia Meta mbeti e pambrojtur dhe nuk i kërkoi njeri falje!
Askush nuk mund të pret nga Kryedhunuesi i Shkodrës, Himarës dhe gjithë Shqipërisë dhe shpura e tij të kërkoj falje, kur ata dhunojnë edhe ministren që i kanë besuar Kulturën dhe e bëjë për të qarë edhe në tribunën e Kuvendit të Shqipërisë; Por, të paktën, të gjithë ata që lindën në Shqipëri pas largimit të komunizmit shqiptar në drejtim të ditur, në ditën e këtij krimi barabar mund ta nxirrnin nga goja qoftë dhe gjysmë llafi!
Apo, ç’e do, Ambrozia është me Saliun!
Këtu flenë dhe lepuri i morrave të kuq, sepse gjithçka do të ndryshonte sikur kjo zonjë të punonte në një media që i thuren lavde Edi Ramës edhe kur pronarit i prishin hotelin; Media i thënçin…
Por, për hir të fjalës dhe mendimit të lirë, për hir të një të ardhme pa dhunë që duhet të sundojë në këtë vend, zonjës Ambrozia Meta duhet kërkuar falje të gjithë shqiptarët, duke përfshirë dhe ata që vazhdojnë si pakicë ta kundërshtojnë këtë regjim!
Duhet kërkuar falje, sepse, sot, kur nuk janë më legjenda urbane, dhe shqiptarët vazhdojnë të heshtin, Edi Rama na shfaqet si dhunues i femrave edhe si Kryeministër, dhe nuk denjon të vejë dorë publikisht edhe mbi një gazetare në detyrë!
Për të mos hedhur diskutimin në Lanë, ndoshta rrjedha politike e Edi Ramës do të ndryshonte dhe ky shfrenim i tij ndaj Ambrozia Metës nuk do të ndodhte sikur edhe Unë që po rendis shkronjat mbi këtë reagim, do të tregohesha shumë më pak i qytetëruar dhe shumë më shumë i angazhuar për të drejtën e gruas edhe kur në moshë të rritur qëndron në krah të Kryetarit të Bashkisë Tiranë, dhe drurin e konsideron mjet komunikimi!
Por, ja që isha dëshmitar i këtij akti barbar te Restoran Piaza në Tiranë, kur Kryetarit të Bashkisë Edi Rama nuk iu përmend Porti i Durrësit, por një rritje tensioni me R.M. përfundoi në “ledhatim” shumë më të egër se ndaj Ambrozias!
Bashkëbiseduesi me të cilin po rrufisja kafe në këtë orë të mbrëmjes, Ambasadori i Kosovës në Tiranë, u trondit shumë, u nis ti dilte në ndihmë femrës që ne kishim përballë me tavolinë dhe Edi Rama e kishte në krah, u krijua një situatë e nderë; Truprojat e morën të “ledhatuarën” ndërsa Unë arrita me shumë sforcim ta qetësoj mikun tim që vinte nga një trevë shqiptare ku nëna dhe motra janë heroina dhe jo objekt grushtimi!
A do të ndikonte tek njeriu Edi Rama sikur ti jepej një “dru edukativ”?! Unë them se jo, por, gjithsesi, Edi Rama nuk do të ishte as Kryetar i Partisë Socialiste, as babë i formatuar për kryesocialistin e ri, dhe, as Kryeministër!
…Harrova, as dhunues i gazetares, Ambrozia Meta!
M’fal Ambrozia!
