Gjyqi për vulën e PD, Doktori apo Likja do ngelen pa parti!
Në një vend ku ka drejtësi, sot, drama trevjeçare rreth vulës së Partisë Demokratike do të merrte fund! Por, në vendin e shqipeve, ku tokën, ujin dhe ajrin e kontrollon Kryeministri Edi Rama, sot, pritet shqyrtimi i Gjykatës së Apelit ndonëse Gjykata e Lartë ishte shumë e qartë si për Kuvendin e Rithemelimit të 11 dhjetorit 2021, vendimet e tij dhe apelimin e këtyre vendimeve nga shpurra e Lulzim Bashës!
Por çfarë mund të vendos sot Edi Rama me gojën e Gjykatës së Apelit për fatin e vulës së Partisë Demokratike, dhe cili mund të jetë epilogu i këtij Vendimi?!
Sikur të kishte drejtësi në këtë vend do të mjaftonte konstatimi i Gjykatës së Lartë rreth vulës së Partisë Demokratike, se përpara se të kalonte në fazën e shqyrtimit të çështjes dhe të merrte në shqyrtim vendimin e dhënë nga Gjykata e Rrethit Gjyqësor, Gjykata e Apelit duhet t’i kishte dhënë përgjigje faktit nëse, vendimi i marrë sipas një gjykimi gracioz, a mund të ankimohet në një shkallë më të lartë gjykimi nga një palë, e cila nuk ka qenë e legjitimuar as nga pikëpamja formale dhe as nga pikëpamja procedurale si palë ndërgjyqëse në procesin gjyqësor të zhvilluar në Shkallë të Parë, dhe çështja të mbyllet menjëherë
Meqë është e qartë e se kjo nuk do të ndodhë sepse Reforma në Drejtësi ka prodhuar vetëm gjyqtarë të Partisë Socialiste, dhe kjo parti ka një kryetar jo dosido, kjo çështje në Apel mund të tjerret madje tjerrja mund të shkoj deri në kufirin gjashtëmujor para zgjedhjeve!
Sikur tjerrja në një Gjykatë Apeli do të ishte normale, sot nga vendimi i dhjetorit 2023 të Gjykatës së Lartë përveç argumentit se Kuvendi i Rithemelimit nga 11 dhjetori i vitit 2021 ishte i thirrur sipas parashikimeve statutore nga ¼ e anëtarëve/delegatëve të Kuvendit Kombëtar, dhe, vendimet e këtij Kuvendi ishin statutore, ashtu siç e kishte argumentuar Gjykata e Shkallës së Parë, Apeli bazuar në këtë vendim do të konstatonte se Lulzim Basha nuk është më Kryetari i PD, dhe do të konstatohej se e drejta e Lulzim Bashës për ankimin e vendimit të Gjykatës së Shkallës së Parë është i pamundur!
Por, kjo dramë tjerrjeje që nisi pas vendimit të Gjykatës së Shkallës së Parë, ku fillimisht u mendua se me urdhër të Kryeministrit Edi Rama u bllokua regjistrimi i vendimeve të Kuvendit të Rithemelimit dhe Lulzim Basha vazhdoj të figuroj në regjistrimin e partive politike si Kryetar, u konfirmua në KQZ kur filloi përgatitja për zgjedhjet lokale të vitit 2023 se Kryetari i PD është në duart e Edi Ramës!
Reforma në Drejtësi e Edi Ramës ka prodhuar shumë precedentë por në analet e drejtësisë do ngelet vendimi i KAS-it kur u pranua autorizimi i Kryetarit Lulzim Basha që nuk ishte kryetar ligjërisht, madje kishte dhënë dorëheqje ndërkohë nga posti i kryetarit ndonëse nuk ishte Kryetar, dhe vendos që Kryetari Nënkryetar i Partisë Demorkatike të jetë Enkelejd Alibeaj! Ky vendim, “Kryetari Nënkryetar i Partisë Demorkatike” kaloi edhe në Apel dhe vendi shkoi në zgjedhje ashtu siç e kishte menduar Edi Rama duke lënë pa parti, kryetarin legjitim të Partisë Demokratike, Sali Berisha!
Rezultati i zgjedhjeve konfirmoi atë që kishte konstatuar Gjykata e Shkallës së Parë, por, kjo nuk e pengoi Edi Ramën të vazhdoj ta mbajë Lulzim Bashën me shpurrën e tij si opozitë legjitime në parlament, aty ku as Basha dhe as 10 mbështetësit e tij as sot nuk e kanë të qartë se kë përfaqësojnë!
Sot, kur Edi Rama arriti ta blejë “non gratën” e Sali Berishës tek zyrtarët e degjeneruar të FBI-së, ta arrestoj me SPAK-un të cilin, siç e pranoi vetë, e krijoi Partia Socialiste, ndërkohë mediat me urdhët të Zyrës së Kryeministrit shpikën shprehjen “PD zyrtare” dhe njohën kryetar legjitim, Lulzim Bashën, epilogu i dramës në Gjykatën e Apelit mund të jetë vetëm dramatik:
-Gjykata e Apelit mund ta respektoj vendimin e Gjykatës së Lartë duke konfirmuar vendimin e Shkallës së Parë që njeh vendimet e Kuvendit të Rithemelimit, dhe Komisioni i Rithemelimit të vazhdoj regjistrimin e vendimeve të tij deri në zgjedhjen e Kryetarit të PD, Sali Berisha, që do të nënkuptonte pjesëmarrjen e ligjshme në zgjedhjet parlamenatre të vitit 2025 pa u fut në listën e Partisë së Lirisë, dhe fundin e partisë së Likes në skenën politike!
-Gjykata e Apelit mund ta shtyjë këtë vendim deri në kufirin e gjashtëmujorit duke dhënë vendimin bazuar në vendimin e Gjykatës së Lartë për PD-në e Doktorit i cili pas kalimit të afateve do ta ketë të pamundur të regjistrohet në KQZ dhe sërish do futet në listën e Partisë së Lirisë, por, do ta ketë gurin dhe arrën që Lulzim Bashën dhe shpurrën e tij ta lë jashtë zgjedhjeve në momentin kur dorëzohet lista me kandidatë për deputetë dhe Bashës i duhet vula e endur për shumë kohë nga Edi Rama!
-Ose, e fundit fare, socialiste puro, që Gjykata e Apelit, me urdhër të Kryeministrit Edi Rama do ta lë Doktorin pa vulën e Partisë Demokratike dhe do ta shpëtoj partinë e Likes që po shuhet, dhe e cila me listën e përbashkët me partinë e Berishës, do të futet në zgjedhjet e vitit 2025 duke merr aq mandate sa nuk do ti sheh në ëndërr jo Likja por as Edi Rama që krekoset te miqtë e tij ndërkombëtar se i ka dhënë dorën e fundit, të shumëkorruptuarit Ilir Meta!
Për Zotni Lafshin, gjithsesi, nuk ka të papritura, ai kurrë nuk kishte parti!
