Aksident i rëndë në Ankara, 9 të vdekur dhe 26 të plagosur

Një aksidenti i rëndë ka ndodhur pranë lagjes Polatli të Ankarasë ku mbetën të vdekur të paktën 9 persona dhe 26 të tjerë u plagosën pasi një autobus u përplas me kolonën e urës.

Agjencia shtetërore turke e lajmeve Anadolu raporton se mëngjesin e sotëm autobusi me targa 04 AAV 951 i kompanisë “Öz Ağrı Seç Turizm”, i nisur nga Izmiri për në Ağrı dhe drejtuesi i të cilit ende nuk është identifikuar, ka dalë nga rruga pranë fshatit Olukpinar dhe është përplas në kolonat e urës.

Zjarrfikësit kanë dalë në vendngjarje dhe kanë shpëtuar të bllokuarit në autobus. Të plagosurit janë dërguar me autoambulanca në spitalet përreth.

Guvernatori i Ankarasë, Vasip Shahin, tha se sipas të dhënave paraprake 9 persona kanë humbur jetën dhe 26 të tjerë janë lënduar.

Murat Türkoğlu, drejtues i makinës që po lëvizte pas autobusit në momentin e aksidentit, tha se autobusi ishte pak i shpejtë.

“Filloi të lëkundet 3-4 kilometra përpara, pastaj goditi urën. Pjesët që fluturonin nga autobusi goditën makinën tonë,” tha Murati.

Ndërkohë Ministria e Shëndetësisë konfirmoi se 9 qytetarë humbën jetën dhe 26 u plagosën në aksidentin e autobusit në Polatli të Ankarasë.

“Trajtimi i të plagosurve tanë vazhdon në spitale. Zoti e mëshiroftë qytetarët tanë që humbën jetën, ngushëllimet tona për të afërmit e tyre, ndërsa të lënduarve u urojmë shërim të shpejtë,” tha Ministria e Shëndetësisë përmes një deklarate.

Ministri i Drejtësisë Yilmaz Tunç duke reaguar përmes rrjetit social bëri të ditur se ka nisur hetimi për aksidentin.

“Një hetim gjyqësor është nisur nga Zyra e Kryeprokurorit Publik në Ankaranë Perëndimore në lidhje me aksidentin që na theu zemrat dhe janë caktuar tre prokurorë publikë nën koordinimin e një zv. Kryeprokurori publik Hetimi është duke u kryer me përpikëri.”