“Partizani”, SPAK mbyll hetimet, sot firmosin avokatët e Sali Berishës

Prokuroria e Posaçme kundër Korrupsionit dhe Krimit të Organizuar ka mbyllur hetimet ndaj ish-kryeministrit për ish-kompleksin sportiv “Partizani”, dhe para se t’i dërgohet gjykatës sot ajo do të firmoset nga avokatët e Sali Berishës, pasi që Kryetari i Partisë Demokratike, Sali Berisha, nuk do të paraqitet në SPAK personalisht për t’iu komunikuar mbyllja e hetimeve.

Ndryshe, më 11 shtator Sali Berishës iu komunikua zyrtarisht nga SPAK, se është i pandehur për akuzën e korrupsionit pasiv të funksionarëve të lartë të kryer në bashkëpunim. Ai ka hedhur poshtë akuzat dhe elementët e saj me të cilët është ngritur në dosjen prej 500 faqesh, duke e akuzuar SPAK-un për shumë pasaktësi në aktakuzën e përmbyllur me nxitim.

Kryetari i Partisë Demokratike, Sali Berisha, është nën masën “arrest shtëpie” që nga 30 dhjetori i vitit 2023.