Sëpata e Edi Ramës!
nga Agim Popoci
Plotë tre vjet përçarje, akuza e kundërakuza, përleshje, gaz lotsjellës e madje edhe shkop bejsbolli, kaluan që demokratët të binden me arrestimin e deputetit Ervin Salianji, se arrestimi i liderit të tyre Sali Berisha në regjimin e Edi Ramës, nuk është çështje e Berishës!
Me mënyrën, sforcimin dhe akuzën ndaj Ervin Salianjit, Kryeministri Edi Rama dëshmoi se jo vetëm që ky arrestim nuk mund të jetë çështje e Salianjit, por i hapi sytë të gjithë atyre demokratëve që në frëngji shikonin të gjithë ata demokratë që mbështesnin pafajësinë e Saliut!
Dhe, kur kjo ndodhi, kur vendosën të mos i binden më këtij regjimi dhe strukturat e Partisë Demokratike vendosën të ngrihen në protesta masive duke filluar nga 7 Tetori, Edi Rama me Sigurimin e Shtetit aktivizuan mediat kombëtare që kanë nën kontroll, duke rikthyer idenë nëse ia vlen të protestosh me Partinë Demokratike, tashmë dhe për Ervin Salianjin!
Por, nga Saliu te Salianji, demokratët nuk i ndanë më akuza e Edi Ramës për Saliun, por, i bashkon një det i tërë me marrëzi dhe terrorin shtetëror të Edi Ramës!
Kur Salianji tre vjet më parë ishte i bindur se Saliu kishte minuar opozitarizmin dhe demokracinë, duke e pranuar Amerikën si arbitër donte të shikonte nga e ardhmja, mori shkopin e bejsbollit kundër atyre demokratëve që nuk mendojnë kështu! Edi Rama nuk u kënaq me këtë lloj thërrmimi të Partisë Demokratike, e donte të zhdukur se s’bënë!
8 Janari i vitit 2022 përkundër turpit që nuk ka Drin e Vjosë që e lanë, ishte një moment reflektimi për demokratët, por, jo dhe për Edi Ramën që vazhdoi të fus hundët në punët e opozitës, grisi si cipën amerikane ashtu dhe të drejtësisë, sa të gjithë e kuptuan, duke përfshirë edhe vetë Ervin Salianjin, se nëse dikush korrupton dhe minon demokracinë në këtë vend është, Kryeministri Rama; Dhe, që të gjitha ato që janë thënë për Saliun nga goja e tij dhe gjytyrymëve që ka nëpër këmbë e deri në SPAK, janë vetëm broçkulla!
Dhe jo vetëm kaq! Kur Edi Rama vendosi ta largonte nga jeta politike dhe ti vinte edhe prangat Ervin Salianjit, arbitri për të cilin Salianji ishte i bindur se mund të të jap si penalltinë ashtu dhe kartonin e kuq, heshti, dhe, e la denoncuesin publik të trafikut të drogës të futet në birucën e Ramës me akuzën, Kallëzim Publik!
Ndëshkimi i Kallëzimit Publik me Burg, kjo marrëzi e Edi Ramës që në asnjë mënyrë nuk mund të bëhet precedent në politikën evropiane, por, u hesht nga Perëndimi, mund të mos zgjidhet me protesta kundër këtij regjimi, siç propagandon Sigurimi i Shetit, por është pikënisja e vetme e zgjidhjes së një situate kaotike të cilën e ka krijuar vetëm një njeri, dhe, në një fushë pa arbitër fare!
Kjo kafshë apolitike nuk u ndalua kur vuri fillimisht traun në Rrugën e Kombit dhe e detyroi kombin që të paguaj lëvizjen edhe mbi asfalt! Nuk u ndalua kur kërkoi ndarjen e Kosovës! Nuk u ndalua as kur korruptoi FBI-në për të goditur liderin e opozitës! Nuk u ndalua edhe kur lideri i opozitës u arrestua dhe akuza përfundoi nga dhjetëra pallate të ndërtuara nga dhëndri, në një faturë mjekimi dhe një shërbimi avokatie të paguar nga vajza!
Sot, nëse nuk ndalohet me arrestimin e Ervin Salianjit e demokratët dhe jo vetëm vazhdojnë me mëdyshjen nëse duhet protestuar, deri sa Kryeministri nuk troket në portën e tyre me sëpatë në dorë, Edi Rama nuk ndalon deri sa ti fus flakën gjithë vendit për të jetësuar dhe premtimin e tij të fundit, që ta bëjë vitin zgjedhor 2025 si vitin 1997!
Sepse, Edi Rama e din më mirë se askush, pasi nga Gusmari i Saimir Tahirit e deri në Çorraj të Elisa Spiropalit, pra, në Kurvelesh, e thonë nga hera, shumë qartë:
Kaun që nuk vete në arë e pret sëpata!
