Që ditën që heshte, që kur s’të ka parë…
nga Agim Popoci
Kaluan plotë 12 vite që Qeveria Rama e vjedhë dhe e shet këtë vend, dhe në prag të çdo proteste opozitare gjëmon në të gjitha mediat kombëtare që ka nën kontroll, zëri i opozitarëve den baba den, se me protesta nuk rrëzohet Edi Rama!
T’i që ju binde këtij kumti komunist dhe ke vendosur edhe sot ta braktisësh protestën sepse e organizon Saliu, ke dëgjuar gjë për ndonjë protestë në botë kur një Kryeministër doli dhe iu bind protestuesve, iku dhe në fronin e tij u ul lideri i protestuesve!
Jo zotëri, dole apo nuk dole ti në protestë pak rëndësi ka, por një pushtet në demokraci rrëzohet me votë, ama ti nuk duhet të heshtësh, duhet të protestosh kundër padrejtësisë!
E nëse vërtetë e kërkon dhe një arsye pse duhet të protestosh, zbrit me këmbë në tokë dhe do shohësh dhjetëra prej tyre!
Andon Zako Çajupi duke kujtuar bashkëshorten e tij pas 10 vjetësh që kishte ndërruar jetë, në vajin e tij përveç dashurisë që kishte për të, zuri vend djali i tij që mbeti pa nënë, pa përkdhelitë e saj, e me se rrojnë foshnjat çi rrit çiliminjtë! Dhe, rronte pa shpresë, s’donte të rronte madje dhe perëndinë më nuk e besonte!
Po ty ç’të bëri ky Edi Rama edhe pse la jo një por shumë foshnja pa nënë, që jo vetëm nuk e ke humbë shpresën te ai por nuk të lëviz nervin as për një protestë marshimi, dhe, e thua me plot mllef: Nuk protestoj!
A është ky Edi Rama që organizoi protestë kundër armëve kimike vetëm për ti thënë Amerikës JO, duke keqpërdor vullnetin e popullit, dhe ti i harbuar sepse të kishte kap meraku i mbrojtjes së ambientit, u bëre pjesë e protestës para Kryeministrisë! Dhe, kur e more vesh, se ishte Edi Rama dhe jo lëvizja qytetare që e organizoi këtë protestë, heshte!
A është ky Edi Rama që vuri traun në Rrugën e Kombit dhe kur u paralajmëruan protestat zëri yt mbërrinte ku e ku, por, kur tha Krietari i partisë se nuk do mbahet protesta, ule kokën! Dhe, heshte!
A ishte ky Edi Rama që kanabizoi gjithë vendin dhe la shumë nëna me fëmijë trafikantë të droguar, dhe ti heshte sepse nuk doje ta besoje se një Kryeministër drogon tokën dhe kombin e tij! Dhe, heshte, edhe kur Zv/Kryeministri i tij e pranoi se vendi u kanabizua me urdhër të Kryeministrit Edi Rama me qëllim të rritjes ekonomike të Shqipërisë!
A është ky Edi Rama që kur dëgjoi heshtjen tënde në Rrugën e Kombit, zbriti në Unazën e Madhe për të rrëzuar mbi 400 shtëpi, e ti plotë pezëm u nise për të protestuar. Kur e more vesh se ishte zona elektorale e Saimir Tahirit që u kishte premtuar legalizimin e ndërtimeve pa leje, nuk u zmbrapse; Por, qëndrove deri sa të dha urdhër Krietari të largohesh sepse duhej hapur rruga trafikantëve të drogës që do ndërtojnë kulla shumëkatëshe!
A është ky Edi Rama që dializën e bëri me koncesion për ti dhënë miqve të tij 100 milionë euro, dhe ti heshte sepse gjithandej kumbonte në media dhe jo vetëm, se koncesioni nuk anulohet me protesta!
A është ky Edi Rama që me koncesionin e check-upit nuk dështoi vetëm për ti bërë miqtë e tij milionerë, sepse e gjithë skema ishte shumë më e rëndë se piramidat, dhe ti heshte, sepse check-upi thanë tam-tamet e Ramës ishte i mirë për stabilizimin e sistemit të shëndetësisë, derisa u zbulua se nuk e bënë njeri! Dhe, ti heshte, sepse as ky koncesion nuk anulohet me protesta!
A është ky Edi Rama që bënte monologje me instrumentet kirurgjikale dhe promovonte sterilizimin, i cili rezultoi jo një koncesion, por, një koncesion i cili të mëson se si duhet të vjedhësh edhe në kurriz të sëmurëve; Dhe, ti heshte!
A është ky Edi Rama që përndiqte këmba-këmbës koronavirusin me ushtri dhe ty të ndalonte të dilje edhe në dritare, e ti heshte! Madje laje dhe duart ashtu siç të këshillonte ky njeri që të mashtroi për 10 vjet si Kryeministër!
A është ky Edi Rama që varfëroi dhe shpopulloi veriun deri sa ti ktheje kokën sepse kishe ardhur të jetoje në kryeqytet! Kur varfëria preku Tiranën dhe metastaza me shpejtësinë e rrufesë arriti në Sarandë dhe të gjithë morën dhen për bukën e gojës duke u bërë pjesë e shpopullimit, ti duke parë të birin dhe vëllain nga celulari, duke ju referuar propagandës komuniste vazhdon e ngushëllon veten se kjo është çështje globale; Sepse zotërote ti nuk do të protestosh!
A është ky Edi Rama që vazhdon e shpërndanë ndër komunistë certifikata pronësie si kokrra molle, e soj e sorollop e bëri investitorë strategjikë duke i fal pronat e shtetit, e ti ke mbet vërdallë nëpër gjykata duke mallkuar ligjin 7501 dhe Saliun!
A është ky Edi Rama që promovoi dhe ngriti inceneratorë për të paguar qindra miliona euro të shtetit, dhe ata nuk ekzistojnë ndonëse janë paguar! Dhe ti heshte, tani jo se flet Saliu, por se Belind Këlliçi është i pabesueshëm, dhe Lali Eri fitoi zgjedhjet! Madje heshtja vazhdoi edhe kur ai u certifikua si Kryetar i Bashkisë me vota të vjedhura, e inceneratori vazhdoi të paguhet edhe pse nuk është asgjëkundi, e ti ke frikë ta shikosh edhe nga ekrani protestën e përjavshme para Bashkisë Tiranë!
Mirë, këto janë e kaluara që shihet se nuk kanë lidhje as me ndërgjegjen që mbanë mbi supe, ndërsa për shkërmoqjen e Partisë Demokratike dhe arrestimin e Kryetarit të PD vazhdon të jesh i bindur, ashtu siç të thonë televizionet kombëtare dhe qindra portale: Fajet i ka Saliu! Por, të paktën, ulu e mendo se çfarë ndodhi këto javët e fundit!
Edi Rama po mburret me shitjen e apartamenteve, aty ku dikur ishte Porti i Durrësit, dhe, nuk ekziston më, sepse kështu vendosi Kryeministri i Shkodrës, Himarës dhe gjithë Shqipërisë, pa pyet njeri!
Edi Rama ia fali ishullin e Sazanit, dhëndrit të Ish-Presidentit Trump, pa pyet as veten!
Edi Rama hapi dhe mbylli Ballkanin sa herë ndryshoi horoskopi i Presidentit të Serbisë, Aleksandar Vuçiç!
Edi Rama vendosi të bashkëorganizoj me Serbinë, Kampionatin Evropian U21të futbollit për meshkuj!
Edi Rama do të krijoj Shtetin e Bektashinjve pa e kërkuar njeri!
Edi Rama do ta copëtoj shtetin e Kosovës vetëm pse e kërkon Serbia!
Edi Rama arreston deputetin demokrat Ervin Salianji me akuzën e kallëzimit publik kur një akuzë e tillë nuk ekziston në Kodin Penal!
Dhe, në fund, gjatë kësaj fundjave të fundit, Edi Rama rri e bënë sehir se si po përmbytet Vlora! Nuk ka pse të thotë mbikëqyrësi i hidroforeve kush e ka fajin, dhe se katër nga dy pompat e ujit nuk funksionojnë me muaj të tërë, sepse është po ky Edi Rama që përmbyti Selitën në Tiranë, pa dalë para drejtësisë dhe duke u mbrojtur nga mediat! Dhe, është po ky Edi Rama që në vitin 2010 si lider i opozitës me ndjeshmëri të lartë, dërgoi ndihma në Shkodrën e përmbytur!
A do të dalësh sot në protestë marshimi, kjo është në kokën tënde!
Por, Edi Rama, ishte dhe vazhdon të qëndroj i qetë në fronin e Kryeministrit, që ditën që heshte, që kur s’të ka parë në protestë!
