Nesër PD në pushtet, Berisha: Fondet e buxhetit mjaftojnë për rritjen 100% të rrogave dhe pensioneve!

Duke e cilësuar tallje me pensionistët shfaqjen që ekzekutoi Kryeministri Edi Rama me pensionistët, Kryetari i Partisë Demokratike, Sali Berisha, sot u zotua se ndër vendimet e para të PD-së nesër në pushtet do jenë rritja e pagave dhe pensioneve 100 për qind, që sipas tij është e mundshme me fondet e buxhetit, si dhe heqja e TVSH-së për ushqimet.

“Java që kaloi, shënoi akte kulmore brutale të narkodiktaturës në Shqipëri, fytyra e narkoshtetit doli me pusinë që i zunë ish-presidentit, ish-kryeministrit, ish-kryetarit të parlamentit dhe kryetarit të Partisë së Lirisë, Ilir Meta, me të gjithë shëmtinë e saj para botës.

Por, Edi Rama si një Makbeth i vërtetë, u përpoq të shfrytëzojë këto akte brutale dhune ndaj opozitës me një mashtrim të përmasave makbethiane ndaj pensionistëve shqiptarë.

Ai, në një akt hipokrizie të plotë, u deklaroi 700 mijë grave dhe burrave të moshuar, që kanë shkrirë jetën e tyre në vendin e tyre, se çështja e pensionit të tyre që ditën e parë ka qenë një gozhdë në ndërgjegjen e tij.

Me këtë rast, unë dua t’i them çdo pensionisti dhe pensionisteje, por edhe çdo qytetari shqiptar që kjo deklaratë e tij është një nga mashtrimet më të mëdha, por edhe më të pamëshira, më të pashpirta që ky hajdut bën para shqiptarëve,” tha Sali Berisha, dhe në qoftë se Edi Rama do ta kishte gozhdë në ndërgjegjen e tij pensionin e të moshuarve shqiptarë, nuk do mund të rriste kurrë 3 herë, madje edhe 6 herë, rrogat më të larta dhe të mos të paktën të indeksonte pensionet në Shqipëri dhe të mos dyfishonte- minimumi- pensionet në Shqipëri.

“Të dalësh para shqiptarëve me një deklaratë të tillë, duke mbajtur në krah një nga hajdutët për të shpërfytyruar të këtij vendi, Blendi Gonxhen që ulet në tavolinë me biftekun 1 mijë euro, do të thotë të tallesh në mënyrën më cinike me 700 mijë burra dhe gra që numërojnë kafshatën, që numërojnë ilaçet, që nuk marrin dot ilaçet. Që gjysmën e pensionit ua merr me drita dhe ujë dhe de facto i lë pa mëdyshje më kufijtë e mjerimit.”

Me këtë rast, lideir i opozit u zotua se çdo pension bazë do jetë të paktën 200 euro, aq sa është edhe minimumi jetik!

“Rikujtoj këtu dhe njëherë se me të ashtuquajturin indeksim 1.6 përqind që bëri në muajin tetor, Edi Rama nuk indeksoi as një të katërtën e çmimit të rritur të ushqimeve që në tërësi u rrit me 9.4 përqind në vitin 2024 krahasuar me vitin 2023.
Me këtë rast, jashtë çdo lloj politike përveç detyrimit absolut që ka një qeveri që të shpërndajë të ardhurat kombëtare në mënyrën më të mirë të mundshme, garantoj çdo pensionist se gjatë debatit parlamentar do të bëjmë çdo përpjekje që të vendoset minimumi jetik, me të cilin çdo i moshuar, qoftë edhe ai që nuk ka punuar një ditë të vetme në shtet apo nuk ka paguar sigurime, do të ketë një pension bazë sa minimumi jetik prej 200 eurosh,” tha Berisha ndërsa të gjithë pensionistët e tjerë, mbi këtë bazë do kenë një rritje 20 përqind të pensionistëve.

“Ju mund të më pyesni mua ku janë këto para, ku i merr këto fonde, pse e bën këtë premtim?
Unë u përgjigjem shumë thjeshtë.
Shqipëria ka sot një buxhet për vitin 2025, 2.2 herë më të madh se buxheti i Kosovës.
Kosova vendosi dy javë më parë si pension minimal, d.m.th si pension edhe për ata që nuk kanë paguar një ditë sigurime, por nuk mund të lihen në mëshirë të fatit, pra si pension minimal, 120 euro.
Ishte 100, e bënë 120 euro.
Dhe mbi këtë bazë, pra unë nuk po bëj gjë tjetër, vetëm po zotohem të aplikoj skemën që aplikoi qeveria e Kosovës, dhe mbi këtë bazë një rritje prej 20 përqind në varësi të kontributeve që kanë gjatë jetës së tyre. Kjo është e mundshme 100 përqind.”

Me këtë rast, ai siguroi se Fondet e buxhetit mjaftojnë për rritjen 100 përqind të rrogave dhe pensioneve, e Edi Rama fajëson bizneset sepse kërkon vetëm të vjedhë!

“Ku ishte ligësia dhe pashpirtësia ekstreme e Edi Ramës? Ishte mashtrimi i dytë i tij. Ai kishte marrë biznesmenë në sallë dhe vetëm sa nuk u thoshte se keni kryer krime kundër njerëzimit, pensionistëve, se ju mbani punëtorë informalë apo deklaroni rroga të ulëta.

Ju lutem shumë çdo pensionisti dhe pensionisteje, çdo qytetari dhe qytetareje të më ndjekë në këto moment.
Edi Rama ka dërguar në parlament buxhetin prej 8 miliardë euro dhe me krenarinë se është buxheti më i madh i kohërave.
Ky buxhet 8 miliardë euro, të dashur pensionistë, asnjë qindarkë nuk vjen nga qeveria dhe administrata, i tëri vjen nga bizneset.
Por unë po ndalem përsëri, fondet e nevojshme për të rritur, për të vendosur minimumin jetik 200 euro dhe për të pasur për çdo shqiptar një pension 200 euro dhe për të rritur çdo pension tjetër mbi 20 përqind, ekzistojnë pa asnjë lloj shtrëngimi në 8 miliardëshin që paguajnë biznesmenët shqiptarë, taksa, tatime, etj.
Pra, Edi Rama u përpoq të paraqesë para jush të dashur pensionistë si mburojë për talljen e tij me pensionet tuaja, murin e informalitetit.
Ai nuk e shpiku, informaliteti ekziston dhe duhet luftuar,por çdo qeveritar dhe çdo qeveri, rrogat dhe pensionet, rritjen e tyre e bazon në të ardhurat që mbledh për buxhetin, dhe këto të ardhura sipas tij do jenë 8 miliardë euro,” kreu i demokratëve duke shtuar se donte të shpjegonte me të gjitha mundësitë se sa i pashpirt është Edi Rama.

“Mos harroni se rrogat e shqiptarëve janë në total rreth 800 milionë euro, pra 7.2 miliardë euro teprojnë në buxhet.
U garantoj ju edhe për të rritur 100 përqind rrogat dhe pensionet.
Por si ka mundësi që këta shpifarakë dalin para jush e u thonë se fajin e kanë këta që nuk regjistrojnë punëtorin, në një kohë kur unë kam këtu para 8 miliardë?
Por këta nuk i japin se i vjedhin dhe vetëm i vjedhin.
Ua përsëris, për zgjerimin të rrugës 34 km Tiranë-Durrës, e cila ju garantoj me përgjegjësi absolute se nuk mund të shkojë kurrë më shumë se 50 milionë euro, këta pasi përcaktuan 150 milionë, Lubi Balluku me Edi Ramën kalojnë në 300 milionë euro brenda një harku kohor njëmujor. Jo, thanë, dy korsitë që do shtohen në autostradë do kushtojnë 300 milionë euro.
Apo rruga Tiranë-Ndroq, një rrugë 37 km, e cila nuk mund të kushtojë më shumë se 35 milionë euro, në terren fushor, të butë kudo që kalon, nga 40 e ca milionë që ishte parashikuar, u dyfishua, kaloi në 90 milionë,” tha Kryetari i Partisë Demokratike ndërsa kishte dhe një zotim të veçantë për heqjen e TVSH-së për ushqimet.

“Nesër në pushtet, këto do jenë ndër vendimet e para që do marrim. Unë mund të jap një listë të gjatë këtu, por nuk dua të abuzoj me kohën e askujt.
Dua ta mbyll se beteja jonë në parlament do jetë vendosja e minimumit jetik 200 euro për çdo shqiptar dhe mbi këtë minimum rritjen e pensioneve në varësi të ditëve të punës dhe invaliditetit.
A e dini ju mor miq se çfarë aktesh kanë bërë këta?
Janë qindra e qindra invalidë të operuar për problematika të ndryshme jo në zorrën qorre siç thoshte Edi Rama, por në zorrën e trashë.
Shkoni dhe pyesni pak se sa u kushtojnë materialet që u duhen atyre për higjienën e përditshme.
A mund të besoni ju se dogana i taton këto materiale me 140 përqind të çmimit me të cilin blihen?
Në narkoshtet ndodh çdo gjë. Kjo ndodh edhe me këta,” tha Kryetari i Partisë Demokratike, Sali Berisha, duke u zotuar për PD-në nesër në pushtet:.
“Do bëjmë gjithçka për minimumin jetik 200 euro, për rritjen e pensioneve me 20 përqind për të gjithë ata që kanë kontribute, përveç 200 euro. Sikundër do bëjmë gjithçka për heqjen e TVSH-së për ushqimet.
Por, ne votat nuk i kemi. Ne kemi nevojë për mbështetjen tuaj, për zërin tuaj.
Ju garantoj se nesër në pushtet, PD këto do jenë ndër vendimet më të para që do marrë.”