“21 Janari”, Ish-Ministri i Brendshëm, Saimir Tahiri, dëshmon në SPAK
Ish-Ministri i Brendshëm, Saimir Tahiri, mëngjesin e sotëm është paraqitur në SPAK.
Mësohet se Ish-Ministri i Brendshëm është thirrur në Prokurorinë e Posaçme për të dëshmuar në lidhje me çështjen “21 Janari”, si person në dijeni.
Pas 1 orë e 20 minuta para prokurorëve të SPAK, vetë Ish-Ministri, tha se ishte thirrur për t’u pyetur në lidhje me “21 janarin” dhe një kallëzim të bërë në vitin 2015 prej tij ndaj Lulzim Bashës, në atë kohë Ministër i Brendshëm.
“U pyeta për rolin që kam pasur në datën 21 janar dhe kallëzimin që kam bërë në vitin 2015. I qëndroj pikë për pikë asaj që kam thënë. Roli im ka qenë protestues. Të gjithë kemi qenë protestues. Është një ngjarje që duhet zbardhur. Shpresoj shumë të zbardhet,” tha Saimir Tahiri.
Ndryshe, në fjalëne tij në Parlament në vitin 2015, Saimir Tahiri pretendonte se Lulzim Basha është ai që ka dhënë urdhër për hedhjen e lëndëve kimike mbi protestuesit në demonstratën e 21 janarit 2011.
“Ministri juaj i Brendshëm ka dhënë urdhër që të ngriheshin helikopterët dhe të hidhnin lëndë homogjene mbi demonstruesit tek piramida . 21 janar, në librin e shënimit rezulton: Gjenerali, ora 14:54 urdhri asnjë lloj zjarri pa zbatuar ligjin kundër demonstruesve, por edhe kjo është e korrigjuar dhe mbi të ishte shkruar, asnjë lloj zjarri pa dhënë urdhër. Të dy shënimet duket me sy të lirë që janë të korrigjuar. Po kështu rezulton nga kqyrja se vetëm në datën 21 janar ka falsifikim dhe korrigjim të urdhrave, në këto kushte SHKB ka depozituar sot kallëzimin për Bashën në akuzën shpërdorim detyre, i cili ka dhënë një urdhër të kundraligjshëm pasi nuk është në kompetencën e ministrit drejtimi i operacionit dhe përdorimi i lëndëve kimike. Kjo është padia e depozituar sot për një ministër që rezulton se ka dhënë urdhër të ngrihet helikopteri dhe të hedhë lëndë kimike ndaj protestuesve,“ shprehej Saimir Tahiri në vitin 2015.
Ish-Ministri i Brendshëm, Saimir Tahiri ishte në SPAK me avokatin e tij edhe më 24 qershor 2024, ndërsa ishte liruar nga qelia më 2 qershor 2023, ku është marrë në pyetje nga prokurorët e posaçëm për rreth 2 orë e gjysmë pas një hetimi pasuror të nisur ndaj tij.
Ky hetim pasoi raportimet e mediave se ndërsa Saimir Tahiri vuante dënimin në burg për shpërdorim detyre, bashkëshortja e tij ngriti një perandori biznesi me investime në sektorin e turizmit, estetikës, ndërtimit dhe transportit detar, ku u përmend dhe “Eagle Residence” pranë Ish-Sheshit Shqiponja në Tiranë.
