VOA në qarkun i cili katër herë ishte vendimtar për zgjedhjen e Presidentit të SHBA

Gjatë zgjedhjeve të së martës në SHBA, shumë votues, anketues dhe zyrtarë nga fushata nervoz, do t’i kushtojnë vëmendje të madhe Qarkut Erie në Pennsylvani, i cili praktikisht ka zgjedhur fituesin e katër zgjedhjeve të fundit presidenciale.

Gjatë dekadës së fundit, diferenca e votave midis fituesve dhe humbësve të zgjedhjeve është zvogëluar, duke mabjtur një trend kombëtar që mund të mos jetë dhe aq e papritur. Në fund të fundit, siç tha për VOA, profesor i historisë në Universitetin Gannon në Qendrën Erie, Jeff Bloodworth, “Qarku Erie është një mikrokozmos i gjithë kombit”.

Qarku Erie është më i madhi për nga sipërfaqja në këtë shtet federal, dhe, siç thotë profesori, “ka pak më shumë të bardhë, është pak më i varfër dhe pak më pak i arsimuar se mesatarja e Pennsylvanisë”.

Kandidatët presidencialë si ai partisë Demokratike ashtu dhe Republikane bënë fushatë pikërisht këtu në javët e fundit para zgjedhjeve.

“Qarku Erie, gjithçka rrotullohet rreth teje. Mënyra se si ju votoni në zgjedhjet presidenciale shpesh parashikon rezultatin përfundimtar,” tha Zv/Presidentja Kamala Harris, në një tubim të demokratëve në atë qark.

Ish-Presidenti Donald Trump gjithashtu mbajti miting në këtë qark.

“Unë jam këtu në Erie, Pennsylvani, me punëtorë që dikur ishin demokratë, por tani ata janë të gjithë republikanë të Trumpit, sepse e dinë se Trump do t’i çojë në tokën e premtuar,” tha ai para të tubuarve.

Demokratët tradicionalisht mbizotërojnë në qytet. Por partia nuk merr asgjë si të mirëqenë, ajo angazhohet për pjesëmarrje maksimale si në qytet ashtu dhe në qark.

“Ne kemi kaluar pikën kur bindim votuesit dhe tani është koha që bazën tonë elektorale ta çojmë për të votuar, dhe asgjë nuk funksionon më mirë se trokitja në derë dhe kontakti personal,” tha presidenti i demokratëve lokal, Sam Talarico.

Ai thotë se vizitat e kandidatëve presidencialë në Erie bëjnë ndryshimin kur bëhet fjalë për entuziazmin.

“Me një epërsi në sondazhe që është si në lisharëse dhe ndoshta jo të besueshme në një garë kaq të ngushtë, e vetmja gjë në të cilën mund të mbështetemi është entuziazmi dhe ne e dimë se entuziazmi në qarkun Erie është i madh,” shtoi Talarico.

Republikanët janë më të fortë në komunitetet më rurale të këtij qarku.

Harold Ross po shkon derë më derë të qarkut Erie dhe qarkut fqinjë Warren, ku ai jeton, për të kërkuar mbështetje për Trump.

“Troket në derë dhe nuk e dini se me kë do të përballesh. Mund të hasni në një demokrat të fortë. Në njëfarë mënyre, Ju bëni përpjekje të qëndroni neutral sepse nuk dëshironi që të duket sikur po nxitoni,” sqaroi Ross, i veshur me një bluzë me një foto policie të ish-presidentit gjatë arrestimit të tij në vitin 2023 në Georgia, pasi ai u akuzua për përpjekje të paligjshme të ndryshimit të rezultatit të zgjedhjeve në vitin 2020.

“Kam hasur në demokratë të cilët në fakt më thonë se do të votojnë për Donald Trump,” tha Ross.

Linda Pecino është drejtuese e zyrës së fushatës së Trump në qytetin Corry. Ajo për VOA thotë se nuk ka fjetur e shqetësuar për fatin e Trump në zgjedhje.

“Papritmas diçka më trondtit dhe mendova se ai kishte fituar. Ai do fitoj. Ai do të fitoj në Pennsylvani,” kujton Pecino.

Erie ka qenë prej kohësh në anën e humbësve, pavarësisht nga partia në pushtet. Njerëzit u larguan kur u mbyllën fabrikat. Tani njerëzit këtu tërhiqen nga turizmi rekreativ dhe aktivitetet, siç janë, lundrimi me varkë ose degustimi i verës.

Mario Macha është gjenerata e dytë e familjes që drejton vreshtin. Babai dhe xhaxhai i tij ishin emigrantë nga Italia dhe zhvilluan biznesin familjar përgjatë brigjeve të liqenit Erie për më shumë se gjysmë shekulli. Ata investuan në një biznes që ka më shumë se 240 hektarë me vreshta dhe drithëra.

Disa në qark, sipas Machas, janë të lodhur nga vëmendja që votuesit i përkushtohen fushatave presidenciale.

“Nuk njoh askënd që e blen dhe gëzon vëmendjen e madhe,” tha ai duke shprehur dëshirën të dëgjoj më shumë pragmatizëm nga fushatat presidenciale, dhe më pak retorikë të ashpër, veçanërisht për një çështje kritike për biznesin e tij, fuqinë punëtore emigrante.

“Pa fuqi punëtore, bujqësia në këtë vend do të ndaloj dhe mendoj se të gjithë në bujqësi e dinë këtë. Të gjithë në zinxhirin e furnizimit ushqimor e dinë dhe e kuptojnë këtë gjë,” tha Macha.

Kantina e verës është më e pasur se vendet tipike të ushqimit të shpejtë që popullojnë qytetin Erie.

Në La Cocina Coqui, njerëzit vijnë në pushimin e drekës për të blerë ushqim. Shumë prej tyre flasin spanjisht, nostalgjik janë për pjatat portorikane të cilat i bënë pronarja Leida Rodriguez.

Një fluks njerëzish nga zonat spanjishtfolëse, veçanërisht ato nga Puerto Rico ose prindërit e të cilëve kanë lindur në atë territor të Karaibeve të Shteteve të Bashkuara, ka ndihmuar që të kompensohet rënia e popullsisë së Eries në vitet e fundit.

Rodriguez tha se në këtë sezon zgjedhor, klientët e saj duan gjithashtu një president që do të zgjidhë inflacionin.

“Çmimet e ushqimeve, qiraja që po rritet këtu. Ata thjesht vetëm po shikojnë, e kush do t’i ndihmoj,” thotë ajo gjatë një pushimi të shkurtër në kuzhinën e restorantit të vogël.

Përparësia e demokratëve në regjistrimin e votuesve dhe organizimi i tyre i fushatës duket se favorizon Harris këtu, por profesori Bloodworth tha se ky supozim mund të mos jetë aktual.

“Para Trumpit, ju do ta shikonit këtë dhe do të mendonit se demokratët do të fitojnë. Ata janë të organizuar. Ata kanë dhjetëra punëtorë me pagesë në një qark prej 200.000 banorësh. Kjo thjesht duhet të ketë kuptim. Megjithatë, nuk ka, sepse Donald Trump në njëfarë mënyre ka ndryshuar rregullat e politikës amerikane,” tha ai për VOA.

Për momentin, duke se demokratët dhe republikanët në qark bien dakord vetëm për një gjë, ata janë shumë të shqetësuar për pritshmëritë e larta përpara zgjedhjeve në qark që duhet ti fitojnë, në shtetin federal që duhet të fitojnë gjithashtu./VOA/