Kur nuk vendos Rama e Duka, kapiteni Kosovës: Përfaqësojmë shtetin tonë!

Pas ndërprerjes së ndeshjes në Bukuresht, kapiteni i Dardanëve, Amir Rrahmani duke sqaruar se kishte bërë përpjekje që ta bindë gjyqtarin të merr masa për thirrjet Anti-Kosovë në stadium, i ka bërë thirrje UEFA-s që të marrë masa dhe t’i mbrojë futbollistët kur përballen me sjellje raciste.

“Ka pasur thirrje të vazhdueshme ‘Serbia, Kosova’. Kjo ndodhi për 90 minuta. Në minutat shtesë, nisën thirrjet me fjalë të tjera që s’dua t’i përsëris sepse është turp. I thash për herë të parë gjyqtarit që t’i dëgjojë. Ai s’bëri asgjë”.

Dhe, thirrjet raciste vazhduan, shton kapiteni i përfaqësueses së Kosovës!

“Herën e dytë s’deshi të dëgjojë. Pas herës së tretë i thash që do të dalim sepse kjo është shumë e gabuar. Ata kanë qenë në dijeni sepse Federata jonë ua ka bërë të qartë që të provojnë të shmangin këtë.

Fansat nisën edhe më shumë pas kësaj me thirrjet ‘Kosova, Serbia’. Prandaj vendosëm të mos dalim më siç ndodhi vitin e shkuar,” tha Rahmani duke i bërë thirrje UEFA-s:

“UEFA duhet të vendosë sepse jemi futbollistë, jemi për të përfaqësuar këtu popullin tonë, shtetin tonë që ka të kaluar të rëndë. Një luftë e madhe ka marrë jetën e njerëzve, ka pasur masakra. Kjo është e tepërt. Ndaluni!”, tha kapiteni i Kosovës, Amir Rahmani duke përfunduar:

“Të gjithë duhet ta dinë se Kosova është Kosovë ose Kosova është Shqipëri. Kaq. Këtu mbaron”, ka përfunduar kapiteni i Kosovës.

Ndërsa trajneri i përfaqësueses së Kosovës, Franco Foda, tha se respekti në fushën e lojës kundër Rumanisë humbi, prandaj skuadra e Kosovës vendosi të mos kthehet në fushë. 

Foda: Respekti humbi, prandaj vendosëm të mos kthehemi në fushë

Trajneri i Kombëtares së Kosovës, Franco Foda, pas përfundimit të ndeshjes ndaj Rumanisë në Bukuresht, ssqaroi vendimin për të mos vazhduar lojën.

“Dje në konferencën për shtyp, theksova se është e rëndësishme që secili të tregojë respekt. Para ndeshjes, i thashë lojtarëve se duhet të tregojmë veten sonte, dhe bëmë një lojë të mirë. Por, në fund të ndeshjes, respekti humbi. Vendosëm të dalim nga fusha dhe, pas një diskutimi me të gjithë, situata nuk ndryshoi. Prandaj, vendosëm të mos kthehemi në fushë,” tha Foda duke shtuar se se thirrjet dhe sjelljet e tifozëve vendas nuk mund të tolerohen dhe shpreson që UEFA të marrë masa.

“Çdokush duhet ta kuptojë se ne jemi Kosova dhe meritonim respekt. Shpresoj që UEFA në të ardhmen të marrë hapat e duhur për të parandaluar raste të tilla!” 

Ndryshe, lojtarët e Kosovës nuk i janë bindur gjyqtarit dhe nuk kanë dalur në fushë për ta vazhduar ndeshjen me Rumaninë dhe arbitri përfundoi ndeshjen.

Sipas rregullave të UEFA-s, nëse një kombëtare nuk vazhdon lojën për shkak të thirrjeve raciste, UEFA duhet të ekzaminojë nëse situata justifikon vendimin. Në varësi të hetimit, pasojat mund të prekin njërën ose të dyja palët, por rregulloret synojnë të mbrojnë futbollistët dhe të luftojnë racizmin në sport.