Sot Prishtina më afër Shkupit, Edi Rama e largon Tiranën!

Qeveria e Kosovës dhe ajo e Maqedonisë së Veriut sot zhvilluan mbledhjen e përbashkët në Prishtinë ndëkohë që tradita e mbledhjeve të përbashkëra Shqipëri-Kosovë u ndërpre në mënyrë të njëanshme nga Kryeministri Edi Rama dy vjet më parë, i zemëruar pse Kryeministri Albin Kurti po luftonte krimin serb në Veri të Kosovës.

Marrëveshja për kalime të përbashkëta kufitare ka qenë kryefjala për kryeministrin Albin Kurti gjatë takimit ndërqeveritar mes kabinetit në Kosovë e asaj në Maqedoni të Veriut.

“Një nga rezultatet kryesore të takimit të sotshëm do të jetë nënshkrimi i protokollit teknik që del nga marrëveshja për kalime të përbashkëta kufitare. Duke filluar nga janari i vitit 2025, në dy pikat kufitare Hani i Elezit – Bllacë dhe Jazhincë – Glloboçicë, do të zbatohet modeli ‘hyrje – hyrje’, ku zyrtarët tanë policor do të punojnë së bashku në një ndërtesë. Ky bashkëpunim do të reduktojë kohën e pritjes në kufi dhe do të lehtësojë lirinë e lirë të qytetarëve,” tha Albin Kurti ku ka përmendur dhe investimet që priten të bëhen në infrastrukturën kufitare, përkatësisht përfundimin e ndërtimit të dhjetë kilometrave të mbetura të autostradës nga Bllaca në Shkup dhe ndërtimin e tunelit që lidh Prizrenin me Tetovën.

Ky takim, tha ai, vjen edhe në nder të 15-vjetorit të vendosjes së marrëdhënieve diplomatike mes dy vendeve, ku deri më tani janë nënshkruar mbi 50 marrëveshje dhe memorandume, duke theksuar zbatimin e plotë dhe të përpiktë të tyre.

“Republika e Kosovës dhe Republika e Maqedonisë së Veriut nuk kanë mos marrëveshje. Kemi komunikim të hapur dhe bashkëpunim të gjerë. Jemi fqinj, miq dhe partnerë të lidhur jo veç prej tregtisë, por edhe përmes lidhjeve mes familjeve e bizneseve tona që po forcohen përherë e më shumë,” tha Kryeministri i Kosovës, Albin Kurti duke fol për rritjen e eksportit nga Kosova në Maqedoni të Veriut, nga 44 milionë në vitin 2019 në 121 milionë euro për vitin 2023; Dhe, nga janari deri në nëntor të këtij viti, Kurti ka thënë se janë regjistruar 5 milionë kalime kufitare në të dy kahjet, nga 3.5 milionë në vitin 2019.

Ndërsa Kryeministri i Maqedonisë Veriut, Hristijan Mickoski, është i bindur se vitin e ardhshëm bashkëpunimi ekonomik ndërmjet shtetit që ai drejton dhe Kosovës do të arij mbi 500 milionë euro.

“Vitin e ardhshëm bashkëpunimi ekonomik do të jetë mbi gjysmë miliardë euro, duke përfshirë tregtinë në mes dy vendeve tona. Në vitet që pasojmë, do të punësojmë në drejtim që bashkëpunimi ekonomik të jetë akoma më i madh, meqenëse kjo do të na sjellë përfitime për dy vendet,” tha Mickoski ndërsa shtoi se marrëveshjet që priten të nënshkruhen sot gjatë ditës do të jenë nga fushat energjetike, kufitare dhe ekonomike.

“Do të jem i lumtur nëse për disa javë prej sot, të kemi një pikë të kalimit kufitar, ku qytetarët do të ndalen në një pikë kalimi dhe jo në dy. Në këtë mënyrë s’do të ketë rrëmuja në kufi dhe do të përshpejtohet transferi i qytetarëve.”

Pas takimit ndërqeveritar mes dy kabineteve nga Kosova e Maqedonia e Veriut u bë edhe nënshkrimi i marrëveshjeve dypalëshe.

Ministri i Punëve të Brendshme i Kosovës, Xhelala Sveçla, me homologun e tij nga Maqedonia e Veriut Pance Taskovski nënshkruan protokolli për pikat e përbashkëta të kalimit kufitar.

Memorandum mirëkuptimi u nënshkrua edhe ndërmjet Ministrisë së Ekonomisë së Republikës së Kosovës dhe Ministrisë së Energjisë, Minierave dhe Burimeve Minerale të Qeverisë së Republikës së Maqedonisë së Veriut, ku dy ministret Artane Rizvanolli e homologia e saj maqedonase vunë nënshkrimet  e tyre në memorandumin për sektorin e energjisë në përputhje me politikat dhe strategjinë e tyre.

Po ashtu, memorandum u nënshkrua edhe mes dy Ministrive të Arsimit nga Kosova e Maqedonia e Veriut.

Ministrja Arbërie Nagavci nga Kosova e Vesna Janevska nga Maqedonia e Veriut nënshkruan marrëveshje për fushën e arsimit dhe trajnimit profesional.

Këto marrëveshje u nënshkruan në prani edhe të dy kryeministrave atij të Kosovës e Maqedonisë së Veriut.

Tirana largohet nga Prishtina

Dhe, deri sa me mbledhjen e sotme banorëve të brezit kufitar Kosovë-Maqedoni e Veriut do t’u lehtësohet lëvizja me hapjen e pikave të përbashkëta të kalimit kufitar Hani i Elezit – Bllacë dhe Glloboqicë – Jazhincë, pas anulimit të mbledhjes së dy qeverive Shqipëri-Kosovë në 2 Qershorin e vitit 2022 në Gakovë, Edi Rama jo vetëm që nuk kërkoi falje pas sulmit terrorist serb të 24 shtatorit ku rezultoi se Albin Kurti kishte të drejtë që i vendosi masa Kosovës, por banorëve të Malësisë së Gjakovës u vështirësoi edhe më shumë jetën!

Sot, banorët e të dy anëve të kufirit, më lehtë e kalojnë çdo kufi fundor evropian si në Itali, Kroaci, Slloveni, Hungari, Rumani, Bullgari dhe Greqi se sa atë në Qafën e Morinës; Pikë kjo e kalimit kufitar Shqipëri-Kosovë që të shpie në qytetin e vetëm ku e gjithë Tropoja mbanë jetën, Gjakovë!

Dhe, sot kur nuk dihet ende se kur do të marrë leje Edi Rama nga Presidenti i Serbisë, Aleksandar Vuçiç për të zhvilluar mbledhjen e radhës me Kosovën, Zyra e Kryeministrit të Kosovës, Albin Kurti, e ka bërë të ditur agjendën për mbledhjen e përbashkët e cila nis në orën 10:30 në Prishtinë: