Prodhimi në vështirësi, industria dhe energjia me rënie, vetëm ndërtimi me rritje

Ecuria e prodhimit, punësimit dhe shitjeve nuk ka qenë e mirë për sektorët e industrisë dhe energjisë elektrike, ndërsa sektori i ndërtimit ka vijuar të performojë pozitivisht në tremujorin e tretë të vitit 2024, sipas statistikave afatshkurtra të INSTAT.

Industria, prodhimi me rënie, papunësia në rritje

Sektori i industrisë pati një ecuri negative në të gjithë treguesit në tremujorin e tretë të vitit 2024 raportoi INSTAT, si rrjedhojë e krizës së shumëfishtë që po përjeton ky sektor nga rënia e euros dhe kërkesa më e ulët në tregjet ndërkombëtare.

Indeksi i shitjeve neto në volum shënoi rënie 2.8 për qind, krahasuar me të njëjtën periudhë të një viti më parë.

Indeksi i prodhimit në volum shënoi rënie 4.6 për qind, krahasuar me të njëjtën periudhë të një viti më parë.

Indeksi i numrit të të punësuarve shënoi rënie vjetore 5.5 për qind dhe indeksi i fondit të pagave shënoi rritje 1.2 për qind, krahasuar me të njëjtën periudhë të një viti më parë.

Energjia, prodhimi dhe punësimi me rënie

Sektori i energjisë ka shënuar rënie të volumit të prodhimit dhe rritje të papunësisë gjithashtu. Sipas INSTAT, indeksi i shitjeve neto në volum shënoi rënie 7.3 për qind në tremujorin e tretë të vitit 2024, krahasuar me të njëjtën periudhë të një viti më parë.

Indeksi i prodhimit në volum shënoi rënie vjetore me 5.4 për qind, ndërsa indeksi i numrit të të punësuarve shënoi rënie 5.8 për qind. Nga ana tjetër, indeksi i fondit të pagave shënoi rritje 9.2 për qind, krahasuar me të njëjtën periudhë të një viti më parë.

Në aktivitetet e furnizimit me ujë, trajtimit dhe menaxhimit të mbetjeve indeksi i shitjeve neto në volum shënoi rritje 8.5 për qind, krahasuar me të njëjtën periudhë të një viti më parë. Indeksi i prodhimit në volum shënoi rritje 8.1 për qind, krahasuar me të njëjtën periudhë të një viti më parë.

Indeksi i numrit të të punësuarve shënoi rënie 1.2 për qind, krahasuar me të njëjtën periudhë të një viti më parë dhe indeksi i fondit të pagave shënoi rritje 5.6 për qind, krahasuar me 2023.

Ndërtimi, rritet prodhimi dhe shitjet

Indekset e treguesve në aktivitetin Ndërtim, në tremujorin e tretë 2024 tregojnë rritje. Sipas INSTAT, indeksi i shitjeve neto në volum shënoi rritje 9.1 për qind, krahasuar me të njëjtën periudhë të një viti më pare dhe indeksi i prodhimit në volum u rrit me 5.6 për qind.

Indeksi i numrit të të punësuarve shënoi rritje 1.1 për qind, krahasuar me të njëjtën periudhë të një viti më parë dhe fondi i pagave shënoi rritje 9.7 për qind./Monitor.al/