Rrugë të mbuluara me borë dhe ngrica, Policia e Kosovës apelon për kujdes të shtuar

Policia e Kosovës i ka bërë thirrje të gjithë pjesëmarrësve në trafik që të tregojnë kujdes të shtuar gjatë drejtimit të autmojetit në rrugë të mbuluara me borë dhe ngrica.

“Duke marrë parasysh ndryshimet e fundit të kushteve atmosferike dhe reshjet e borës, policia këshillon: Përshtatjen e shpejtësisë me kushtet atmosferike dhe gjendjen e rrugës. Mbajtjen e distancës së sigurt mes automjeteve. Ngadalësimin e lëvizjes në rrugë të mbuluara me borë dhe ngrica,” thekson Policia e Kosovës duke sqaruar se ky apel synon të parandalojë aksidentet dhe të sigurojë një qarkullim të sigurt për të gjithë përdoruesit e rrugës gjatë kushteve të vështira dimërore.

Ndërkohë Ministria e Infrastrukturës bënë të ditur se pavarësisht reshjeve të vazhdueshme, të gjitha rrugët në Kosovë janë të kalueshme.

“Me 19 kontrata aktive, jemi duke punuar në teren gjatë gjithë kohës që qarkullimi në rrugë të jetë sa më i lehtë. Të gjitha rrugët janë të kalueshme me gjithë reshjet e vazhdueshme,” thekson Zv/Ministri i Mjedisit, Planifikimit Hapësinor dhe Infrastrukturës, Hysen Durimishi, përmes rrjetit social duke bërë apel:

“Ju bëjmë thirrje të gjithë pjesëmarrësve në komunikacion që të vozisin me kujdes duke respektuar rregullat dhe duke ju përshtatur kushteve në komunikacion.”