Zoran Milanoviç rizgjidhet President i Kroacisë

Në balotazhin e zgjedhjeve për presidencën kroate, pothuajse 75 përqind e votuesve votuan për presidentin aktual, Zoran Milanoviç. Ai konsiderohet si kritik i qeverisë kroate dhe Perëndimit për mbështetjen ushtarake që i jep Kievit.

Presidenti kroat, Zoran Milanoviç u zgjodh për një mandat të dytë. Pas numërimit të pothuajse të gjitha votave, u konfirmua se 75 për qind e votuesve votuan për kandidatin e Partisë Socialdemokrate në opozitë. Dragan Primorac nga Bashkësia Demokratike Kroate, HDZ, në pushtet mori rreth 25 përqind. “Faleminderit Kroaci !” tha Milanoviç në festën pas zgjedhjeve në një qendër kulturore në Zagreb. “Unë e shoh këtë fitore si njohje të punës sime gjatë pesë viteve të fundit dhe si një mesazh nga populli kroat për ata që duhet ta dëgjojnë atë,” shtoi ai, duke iu referuar qeverisë së kryeministrit Andrej Plenkoviç nga radhët, me të cilin ka konflikte.

58-vjeçari Milanoviç ka drejtuar qeverinë kroate nga viti 2011 deri në vitin 2016 dhe u zgjodh në presidencë për herë të parë në vitin 2020. Dy javë më parë ai humbi me pak vota rizgjedhjen për një mandat të dytë në raundin e parë të votimit me 49 për qind. Por më pas Milanoviç hyri në balotazh si favorit i qartë kundër Primorac në vendin e dytë.

Sipas Komisionit Qendror Zgjedhor, pjesëmarrja e votuesve dje në votime ishte pothuajse 44 për qind, pak më pak se në raundin e parë të votimit.

Milanoviç kritik i politikës proukrainase

Primoraç e kishte kritikuar vazhdimisht Milanoviçin gjatë fushatës zgjedhore si një kukull proruse dhe e kishte akuzuar atë për minimin e besueshmërisë së Kroacisë në BE dhe NATO.  Presidenti kroat, Milanoviç e ka dënuar pushtimin rus të Ukrainës, por ka kritikuar vazhdimisht mbështetjen ushtarake të Perëndimit për Kievin. Milanoviç kundërshtoi gjithashtu një program në të cilin ushtarët kroatë në Gjermani do të ndihmonin në trajnimin e ushtarëve ukrainas.

Kreu i shtetit kroat nuk mund të vërë veton ndaj ligjeve në Kroaci, por i dëgjohet fjala në politikën e jashtme, atë të mbrojtjes dhe sigurisë. Gjatë mandatit të tij të parë në detyrë, Milanoviç u përplas vazhdimisht me kryeministrin aktual Plenkoviç për politikën e jashtme. Të dy politikanët kanë mosmarrëveshje të forta dhe vazhdimisht ofendojnë njëri-tjetrin publikisht./DW/