Në Teqenë e Alipostivanit, u gjet pa shenja jete Baba Hekuran

Babai i teqeve të Frashërit, Alipostivanit dhe Përmetit, Baba Hekuran Nikollari, ka ndërruar jetë papritur në moshën 61 vjeçare.

Lajmi konfirmohet nga policia teksa rrethanat e ngjarjes janë ende të paqarta dhe pritet ekspertiza mjeko-ligjore që të zbardhë më shumë mbi shkaqet e vdekjes.

“Më datë 03.02.2025, rreth orës 22:00, në vendin e quajtur “Teqeja e Alipostivanit”, është gjetur pa shenja jete dhe pa shenja dhune, shtetasi H. N., 61 vjeç, Baba i Teqes.

Nga veprimet e para hetimore dyshohet se ky shtetas ka humbur jetën nga shkaqe natyrale. Pritet ekspertiza mjekoligjore për të përcaktuar shkakun e humbjes së jetës.

Grupi hetimor vijon punën për sqarimin e plotë të rrethanave të rastit,” thekson Policia e Shtetit përmes njfotimit.

Ndryshe, më 4 prill 2002, Baba Hekurani  veshi rrobën e bektashiut dhe u bë dervish i teqesë së Baba Ali Horasanit në Alipostivan. Në vitin 2009, me dekretin e Kryegjyshit Botëror të Bektashinjve, Haxhi Dede Reshat Bardhi, Baba Hekurani u nderua me titullin “Baba” dhe u emërua Baba i teqeve të Frashërit, Alipostivanit dhe Përmetit.