Presidenti Trump dyfishon në 50% tarifat për produktet kanadeze të çelikut dhe aluminit

Presidenti i SHBA, Donald Trump, sot dyfishoi tarifën për të gjitha produktet e çelikut dhe aluminit që hyjnë në Shtetet e Bashkuara nga Canadaja, duke e çuar totalin në 50%. Vendimi vjen si përgjigje ndaj qëndrimit të provincës së Ontarios, që vendosi një tarifë 25% për energjinë elektrike që eksportohet në SHBA.

Përmes një postimi në rrjetin social “Truth Social”, Presidenti Trump shprehet se ka udhëzuar Sekretarin e Tregtisë që të vendosë një tarifë shtesë prej 25%, që do të hyjë në fuqi nesër në mëngjes, raporton VOA.

“Canada duhet të heqë menjëherë tarifën e saj anti-amerikane për fermerët prej 250 deri në 390%, për produkte të ndryshme amerikane të qumështit, që është konsideruar prej kohësh si skandaloze. Së shpejti do të shpall një emergjencë kombëtare për energjinë elektrike brenda zonës së kërcënuar,” shprehet Presidenti Donald Trump.

Presidenti Trump, raporton VOA, tha gjithashtu se do të rrisë ndjeshëm tarifat për makinat që hyjnë në Shtetet e Bashkuara më 2 prill nëse Canada nuk ul tarifat e tjera, skandaloze siç i quajti ai, “të vendosura për kohësh”.