Sot OSBE-ODIHR nis misionin e monitorimit, Zannier: Janë 26 vëzhgues, 300 të tjerë vijnë për 11 Maj

Vlerësimi i përputhshmërisë së zgjedhjeve me angazhimet ndërkombëtare dhe legjislacionin vendas, do të jetë detyra e misionit vëzhgues të OSBE-ODIHR, i cili sot nisi zyrtarisht punën për monitorimin e zgjedhjeve të 11 Majit me 26 vëzhgues në të gjithë Shqipërinë dhe drejtues Lamberto Zannier, ndërsa pritet të mbërrijnë edhe 300 vëzhgues si dhe përfaqësues nga Asambleja Parlamentare e OSBE, Këshilli i Europës dhe Parlamenti Europian.

Misioni vëzhgues i OSBE-ODIHR do të monitorojë të gjitha aspektet e procesit zgjedhor, përfshirë kuadrin ligjor, administrimin e fushatës, mbulimin mediatik dhe transparencën në rrjetet sociale, sqaroi Ambasadori Zannier ndërsa paralajmëroi takime me përfaqësues të institucioneve shtetërore, partive politike, shoqërisë civile dhe komunitetit ndërkombëtar.

“Sot hapim zyrtarisht misionin e vëzhgimit të zgjedhjeve të OSBE-ODIHR. Për ditën e zgjedhjeve do të kërkojmë 300 mbikëqyrës afat shkurtër që do të vijnë në Shqipëri pak para zgjedhjeve. Në ditën e zgjedhjeve do të ketë një komponent më të gjerë të vëzhguesve, vëzhgues nga Asambleja Parlamentare e OSBE, Asambleja Parlamentare e KiE dhe Parlamenti Evropian.

Qëllimi i këtij misioni do të jetë vlerësimi i kryerjes së këtij procesi, nëse do të jenë në përputhje me angazhimet e Shqipërisë ndaj OSBE-së dhe detyrime të tjera të Shqipërisë, si edhe përputhja me legjislacionin vendas. Do të monitorojmë nga afër të gjitha aspektet e zgjedhjeve, si kuadri ligjor, zbatimi i fushatës edhe në rrjetet sociale, puna e administratës zgjedhore në të gjitha nivelet, mosmarrëveshjet dhe mbulimi mediatik në përgjithësi.

Si pjesë e këtij procesi do të jenë edhe takime me përfaqësues të shtetit, partive politike, shoqërisë civile, medias dhe faktorit ndërkombëtar,” u shpreh Lamberto Zannier ndërsa i pyetur për financimet e fushatave me para të padeklaruara si njëri ndër shqetësimet më të mëdha të zgjedhjeve të fundit, dhe nëse ky mision ka një mekanizëm për kontrolluar këto para, ai shtoi:

“Vëzhgimi do të behët duke vlerësuar situatën në terren dhe çfarë është zbatuar nga rekomandimet e mëparshme në këtë fushë. Sigurisht është një nga fushat më të rëndësishme që reagon nëse keni një model të një vendi të mirë demokratik.”

Lidhur me planin e SPAK për hetimin e krimeve zgjedhore dhe mundësinë e bashkëpunimit për raportimin e shkeljeve, Ambasador Zannieri sqaroi:

“Bashkëpunimi me autoritetet është i rëndësishëm, por gjetjet tona do të ndahen përmes raporteve zyrtare.”