Bllokohet vendkalimi Qafë Prush, banorët e Hasit dhe Tropojës: Ndërtoni rrugën, ndryshe…

Ashtu siç kishin paralajmëruar në protestën e parë, sot banorët e Tropojës dhe Hasit vijuan me protesta duke bllokuar plotësisht pikën e kalimit kufitar të Qafë Prushit ndërsa kërkuan ndrërhyrje në 20 kilometrat e amortizuara të rrugës Kam-Qafë Prush.

Përfaqësues nga 20 fshatra të bashkive Has dhe Tropojë kërkuan rikostruksionin që lidh fshatrat me aksin nacional, Krumë-Qafë Prush-Gjakovë, pavarësisht premtimeve që janë dhënë për 30 vite me rradhë.

Nëse nuk përfillet kjo kërkesë për asfaltimin e aksit prej 20 km që aktualisht është e pakalueshme dhe u shërben 2 mijë banorëve, banorët e bënë të qartë nuk do të dalin në votime më 11 Maj.

Në përkrahje të protestës së banorëve i pranishëm ishte edhe Kryetari i Bashkisë Has, Miftar Dauti.

Ndryshe, rruga Kam-Qafë Prush është ndërtuar që në vitin 1938 për shfrytëzimin e burimeve minerale, por më pas ajo nuk është mirëmbajtur fare përkundër lëvizjeve të shtuara me hapjen e kufirit.