Dëborë në prag të verës, zbardhet Thethi

Ndonëse kanë mbetur vetëm dy javë nga nisja zyrtare e sezonit të verës, në qytetin e Shkodrës janë rikthyer reshjet intensive të shiut, ndërsa në aksin Bogë-Theth dhe në zonën e Vermoshit janë rikthyer reshjet e borës.

Rruga është e kalueshme por nevojitet kujdes nga ana e drejtuesve të automjeteve pasi në 24 orët e fundit ka një shtresë të hollë bore.

Sipas Autoritetit Verior të Rrugëve shqetësim mbetet mungesa e pastrimit pasi kompanitë që aplikuan në mirëmbajtjen e këtyre akseve për kontratën e re e cila mbaroi në datën 31 mars, janë në proces ankimimi gjë e cila ka vënë në vështirësi edhe vetë institucionet.

Kompania e mëparshme ka tërhequr makineritë nga ky aks dhe pritet zgjidhja e ngërçit për vijimin e mirëmbajtjes së aksit Bogë-Theth.

Aktualisht, zona e Thethit po pret turistë të shumtë, ndaj edhe kujdesi drejt qarkullimit në këtë aks pritet të jetë i shtuar pasi sot janë konstatuar edhe rënie gurësh.