Lamtumira Bekim Lumit me “Arturo Ui”
Miq, shokë dhe dashamirë u mblodhën sot në Prishtinë për t’i dhënë lamtumirën e fundit regjisorit dhe profesorit të Arteve Bekim Lumi.
Lumi ka ndërruar jetë dje në moshën 52 vjeçare pas një sëmundje të rëndë me të cilën përballej tash e një kohë të gjatë.
Para se të bëhej ceremonia e varrimit u bënë homazhe dhe u mbajt një mbledhje përkujtimore .
Në mbledhjen përkujtimore u luajt një pjesë nga shfaqja e tij e fundit me emrin “Arturo Ui” të cilën e realizoi më 14 qershor në 20 vjetorin e krijimtarisë së tij artistike.
Motra e të ndjerit Drita Lumi ka falënderuar të gjithë ata që kanë qenë pranë familjes në ditët e vështira nëpër të cilat kanë kaluar.
“Kur e shohim tanë këtë dhimbje dhe dashuri për Bekimin e kuptojmë sa të bekuem kemi qenë ne dhe ju me Bekimin. Disa prej jush patët fatin të jeni aktor në shfaqjet skenike të Bekimit, kurse shumë e shumë të tjerë ishit aktorë të dramës jetësore dhe të momenteve shumë të vështira shëndetësore të Bekimit”, tha motra e të ndjerit.
Ajo shpreson se arti i Bekim Lumit do të jetë emblemë në skenën teatrore kosovare.
Pas mbledhjes varrimi i Lumit u bë në varrezat e qytetit ku kanë marr pjesë shumë fytyra të njohura politike e artistike të vendit.
Profesori në Fakultetin e Arteve, Fadil Hysaj, gjithashtu mik i regjisorit tha se ajo çka ka bërë Bekim Lumi për skenën shqiptare është frymëzim për shumë breza, dhe se ai është themelues i post-avangardës shqiptare në teatër.
“Bekim Lumi është themelues i post avangardës shqiptare në teatër dhe si i tillë vërtetë që nuk ka një të dytë dhe ka me kaluar shumë kohë që me ardh një pasardhës i tij në skenën shqipe. Vakumi që len mbrapa ai është një humnerë e pakapërcyeshme për një kohë të gjatë sidomos për studentët e regjisurës, këta që kanë pasë fatin të jenë studentë të tij”, tha Hysaj.
Ndërsa kryetari i Prishtinës Shpend Ahmeti, tha se Lumi ka qenë një artist që ka zgjedh të shprehet përmes artit që ka shkaktuar debat në shoqëri.
“Patjetër se është humbje e madhe që nuk është më në mesin tonë, megjithatë unë besoj se veprat e tij do të qëndrojnë edhe me vite të tëra, ndoshta edhe me gjeneratat që do të mësohen nga studentët. Prandaj unë i shprehi ngushëllim familjes dhe gjithë artistëve e atyre që e kishin mik por edhe thjeshtë shikuesve të artit”, tha Ahmeti
Regjisori Bekim Lumi numëron dhjetëra shfaqje të realizuara, e që kanë rezultuar të suksesshme. Ai gjithashtu u shpërblye me shumë çmime në Kosovë dhe jashtë saj.
Në vitin 2016 ministria e Kulturës, Rinisë dhe Sporteve ia ndau çmimin për “Regjinë më të mirë”.
Në 20-vjetorin e krijimtarisë së tij artistike, regjisori Lumi, në 14 qershor të këtij viti dha premierën e shfaqjes së tij të fundit “Arturo Ui”, që erdhi në përvjetorin e 120-të të lindjes së autorit të saj, Bertolt Brecht. Për shkak të sëmundjes, Lumi nuk mori pjesë në premierë të shfaqjes.
