Në Babaj të Bokës, sot fillon “Defender Europe 25”

Stërvitja ushtarake “Defender Europe 25” fillon sot në Babaj të Bokës të Gjakovës, me pjesëmarrjen e 25 mijë ushtarëve nga 29 vende. Ministri në detyrë i Mbrojtjes, Ejup Maqedonci, tha se kjo tregon besimin e SHBA-së në kapacitetet e FSK-së.

“Veçanti është se këtë vit, vendi ynë, Kosova është përzgjedhur nga ushtria e Shteteve të Bashkuara të Amerikës për Evropë dhe Afrikë si vend ku do të vendoset komanda e divizionit 28 të këmbësorisë së ushtrisë së Shteteve të Bashkuara Të Amerikës, kjo ka rëndësi jashtëzakonisht të madhe për vendin tonë, tregon për besimin që Shtetet e Bashkuara të Amerikës kanë në profesionalizimin e ushtrisë sonë,” tha Ejup Maqedonci duke dhënë hollësi për ushtrimin ndërsa tregoi dhe objektivat e kësaj stërvitje të rëndësishme për Kosovën.

“Ne kemi vendosur objektivat për këtë ushtrim dhe objektivat operacionale për ushtrimin ‘Defender Europe’ nga ana jonë, e Kosovës janë që të integroj njësitë tona në brigade shumëkombëshe, që të demonstroj aftësinë për të pritur një komandë të lartë ushtarake siç është divizioni 28 në territorin e Kosovës, duke e mbështetur këtë divizion ne arrijmë një prej objektivave që kemi për këtë ushtrim që të demonstrojmë aftësinë që kemi kapacitete për të mbajtur si nikoqir një divizion të këtyre përmasave.”

Forat e Sigurisë së Kosovës gjatë kësaj stërvitje ushtarake do t’i zhvillojë disa operacione ku pritet të marrin pjesë 29 shtete me 25 mijë ushtarë të angazhuar.

“Defender Europe 25” do të zgjasë deri më 9 qershor, gjatë të cilit FSK pritet të tregojë gatishmërinë operacionale dhe shkallën e ndërveprueshmërisë luftarake në partneritet me Shtetet e Bashkuara të Amerikës, Shqipërinë, Kroacinë, Maqedoninë e Veriut dhe Bullgarinë.

“Shqipëria do të jetë e angazhuar me forca tokësore, forca speciale, me kapacitete xheniere, do të jetë e angazhuar për herë të parë këtë vit me kapacitete dronësh, me helikopterë dhe njëkohësisht do të ketë edhe një kapacitet detar, i cili do të jetë në koordinim dhe ne do ta mbështesim me kapacitetet ajrore,” ka sqaruar Drejtori i Shtabit të Përgjithshëm të Ushtrisë Shqiptare, Gjeneral brigade Ardian Lilo, duke theksuar se Ballkani dhe Europa Juglindore do të jenë pjesë e skenarit të stërvitjes, në fazën e dytë, “Immediate Response”.