Nga Daytoni, Osmani: Me mbështetjen e SHBA, Kosova po forcohet si partnere euroatlantike

Kosova po pozicionohet si partnere mes vendeve që ndajnë të njëjtat vlera të lirisë dhe sigurisë, tha Presidentja e Kosovës, Vjosa Osmani, në panelin për integrimin euroatlantik të Kosovës dhe paqen e sigurinë në Ballkanin Perëndimor, në sesionin e Asamblesë Parlamentare të NATO-s që po zhvillohet në Dayton të Shteteve të Bashkuara.

“Reformat tona dhe investimi në fushën e mbrojtjes dhe sigurisë po e pozicionojnë Kosovën si partnere mes vendeve që ndajnë të njëjtat vlera të lirisë dhe sigurisë,” tha Presidentja e Kosovës duke e bërë të qartë se me mbështetjen e SHBA po forcojmë themelet e një rajoni më të sigurt ndërsa përfundoi:

“Me mbështetjen e aleatit tonë strategjik, Shteteve të Bashkuara të Amerikës, si dhe aleatëve të tjerë, po forcojmë themelet e një rajoni më të sigurt, më të qëndrueshëm dhe të përkushtuar ndaj vlerave demokratike.”

Ndryshe, një ditë më parë, gjatë një takim me delegacionin amerikan në Asamblenë Parlamentare të NATO-s, Presidentja Vjosa Osmani është shprehur se është mirënjohëse për përkrahjen e vazhdueshme të Shteteve të Bashkuara për Kosovën.