Bleu vota për kandidatin e PS, 4 kontrolle në Elbasan, BKH sekuestron 200 mijë euro dhe celularë

Agjentët e BKH-së kanë zbarkuar mëngjesin e sotëm në Elbasan ku u ekezekutuan 4 urdhra kontrolli, ndërsa është sekuestruar telefoni i një zyrtari të Bashkisë i cili dyshohet se ka blerë vota në favor të një kandidati të PS-së nga lista e hapur.

“Me urdhër të prokurores së posaçme Dorina Bejko, hetuesit e BKH-së të mbështetur nga SPAK zbarkuan mëngjesin e sotëm në qytetin e Elbasanit për të ekzekutuar 4 urdhra kontrolli. Bëhet fjalë për 4 persona që dyshohet të jenë përfshirë në korrupsion zgjedhor, duke blerë vota në favor të PS.

Po ashtu është ushtruar kontroll banese. Në mesin e këtyre 4 personave sipas burimeve nga SPAK, rezulton se iu është sekuestruar celulari edhe një zyrtari pranë Bashkisë Elbasan, që sipas të dhënave paraprake, është përfshirë në shitblerje të votës në favor të një kandidati të PS nga lista e hapur, edhe pse SPAK është e rezervuar për të bërë me dije emrin e kandidatit për deputet,” raporton Panorama me arsyetimin se brenda celularëve që janë sekuestruar mund të kompromentohen njerëz të politikës që janë aktualisht deputetë ose pritet të hyjnë në Parlament pasi kanë fituar më 11 Maj.

Ndërkohë një tjetër prokurore e posaçme pak ditë më parë, kishte urdhëruar kontroll të banesave e bizneseve, por edhe sekuestrim të celularëve të personave po ashtu të përfshirë në korrupsion.

Mësohet se gjatë kontrolleve disa ditë më parë në një banesë në Belsh, që dyshohet se i përket një biznesmeni janë gjetur më shumë se 200 mijë euro. Nëse kjo shumë ka të bëjë krim zgjedhor apo jo, po vlerësohet nga ana e prokurorëve.

Ndryshe, në të dyja rastet ka dyshime të forta për korrupsion në zgjedhje të PS, që fitoi Qarkun Elbasan.

Hetimet janë duke vijuar.