Matura Shtetërore, sot mbi 27 mijë maturantë testohen në Matematikë

Pas testeve të Gjuhës Shqipe dhe Gjuhës së Huaj në kuadër të Maturës Shtetërore 2025, sot më shumë se 27 mijë maturantë nga e gjithë Shqipëria do të testohen në Matematikë.

Testimi do të zhvillohet në orën 10:00 dhe do të zgjasë 2 orë e 30 minuta. Nxënësit janë udhëzuar të paraqiten në qendrat e provimit që në orën 08:00, të pajisur me dokument identifikimi (kartë ID ose pasaportë). Ndalohet rreptësisht mbajtja e telefonave celularë apo orëve inteligjente, për të garantuar mbarëvajtjen dhe integritetin e procesit.

Provimi i fundit i Maturës Shtetërore do të zhvillohet më 24 qershor dhe do të jetë provimi me Zgjedhje, ku maturantët do të kenë mundësi të testohen në një gamë të gjerë lëndësh nga shkencat natyrore, shoqërore dhe ato artistike, në varësi të profilit të tyre.

Ndryshe, përgjegjëse për hartimin, administrimin dhe vlerësimin e provimeve është Qendra e Shërbimeve Arsimore, QSHA. Për të lehtësuar përgatitjen, testet model janë shpërndarë më herët nëpër shkolla dhe online.