A mund ta mbyll Kutinë e Pandorës, rinumërimi?!
nga Agim Popoci
Sot filloi rinumërimi i votave në 2.323 qendra të votimit të zgjedhjeve të 11 Majit 2025, në katër qarqet, Tiranë, Durrës, Elbasan dhe Fier, proces i cili ka hapur shumë debate ndonëse në krye të herës krijon përshtypjen e plotësimit të një elementi shumë të rëndësishëm të demokracisë, të drejtën e votës!
Sikur në pushtet të mos ishte Partia Socialiste, dhe, sikur Kryeministër të mos ishte Edi Rama, si Vendimi i Komisionit të Ankimimeve dhe Sanksioneve, KAS, ashtu dhe zbatimi i këtij Vendimi nga KQZ për rinumërimin e 2.323 qendrave të votimit, padyshim se do të renditej ndër proceset normale të një vendi demokratik!
Por, faktet janë më kokëforta se mashtrimet e Kokëministrit, që, për fat të keq, iu ra për hise shqiptarëve! Çfarë kuptimi ka rimumërimi i rreth 40% votave të totalit të përfshirë në këtë proces, çfarë mund të ndryshoj, dhe, përveç shpresës që ka opozita nga ky rinumërim, a mund të jetë ky edhe një kurth i Edi Ramës për ti vënë kapak pakënaqësive të opozitës për zgjedhjet e 11 Majit, në sy të botës!
Ose, ta mbyll Kutinë e Pandorës që e hapi në vitin 2017 për të vijuar me zotimin e anëtarësimit të Shqipërisë në BE në vitin 2030, që pengesë serioze tashmë ka manipulimin e zgjedhjeve në 11 Maj 2025!
Që në fillim, jo për ta pasur të qartë njëherë e mirë Edi Rama, por që të gjithë shqiptarët kudo që janë, se 713.407 vota që mori Partia Socialiste në vitin 2013, ose 41.36% e përkthyer në 64 mandate mund të pranohet si mundësia reale dhe e fundit e kësaj partie me Ramën në krye, që arriti rezultat historik duke mobilizuar të gjitha qelbësirat e kombit shqiptarë dhe jo vetëm, me maksimalizimin e histerisë kolektive antiberishiste!
Mjafton edhe një votë e vetme mbi këtë rezultat, sikur të mbyllen sytë për të gjitha manipulimet tjera, që zgjedhjet e 11 Majit 2025 të mos konsiderohen të lira dhe të ndershme!
Gjithçka tjetër që bëri Edi Rama me ardhjen në pushtet nga viti 2013, heqja dorë nga premtimet elektorale, mashtrimet, kanabizimin e tokës shqiptare, vjedhje të fondeve publike dhe jo vetëm, përkthehet në blerje të votave pa pyetur për çmim, që me mbarimin e mandatit të parë si Kryeministër!
Janë bërë shumë analiza mbi sjelljen e Partisë Socialiste nga zgjedhje e vitit 2017 e këtej, kur Edi Rama hapi Kutinë e Pandorës pa pyet për mitologjinë greke, kur shqiptarët që jetojnë në këtë epokë kishin rastin të shohin të gjitha të këqijat në këtë botë shqiptare që i solli Rama dhe Partia e tij Komuniste.
Kjo Kuti që ishte një dhuratë e Edi Ramës për Shqipërinë, nuk u kuptua nga lidershipi socialist pse duhej të hapej, kur Partia Socialiste i vuajti për shumë kohë pasojat e zgjedhjeve të vjedhura në vitin 2001 dhe u bë partner i pabesueshëm për aleatët perëndimor ndërsa Shqipëria u bë anëtare e NATO-s dhe me liberalizim të vizave, por, sondazhet e këqija që i dolën Ramës në prag të zgjedhjeve të vitit 2017 i bën të heshtin edhe ata që ishin të bindur se manipulimi zgjedhor nuk është i nevojshëm përballë një opozite “kaq të dobët”.
Për të heshtur, heshtën, por masakra elektorale e vitit 2017 i bëri për të vjellur edhe disa prej tyre ndërsa ndërkombëtarët zgjodhën heshtjen, sepse ky manipulim elektoral nuk kishte element intelektual të mashtrimit si “Dushku”, jo vetëm për vetë faktin se po drejtohej nga Edi Rama, por, ishte një kopje e vitit 2003 për zgjedhjet e Kryetarit të Bashkisë Tiranë, që konsistonte në mbushje kutish dhe blerje të votave!
Para se të hapej Kutia e Pandorës në vitin 2017, shqiptarët të vetmen të keqe që njihnin nga regjimi i Edi Ramës në procesin zgjedhor ishte largimi i familjarëve nga puna për votën që nuk ju dhanë socialistëve, dhe, askush nuk i dinte të dhënat e tyre që kontrolloheshin nga patronazhistët, askush nuk u kishte blerë kartën e identitetit që të mos votojnë, askush nuk u kishte dhënë lejet për parcela me kanabis në këmbim të votave, dhe, shefat e bandave kriminale nuk ishin pa kurrë si bossa në qendrat e votimit!
Me hapjen e kësaj Kutie në prag të zgjedhjeve, dhe, bazuar nga ato pak gjëra që dinin nga mitologjia greke, si dhe impaktin që pati në popull “çadra e lirisë” që organizoi Partia Demokratike, shqiptarët nuk e ndjenin veten të humbur por të vjedhur, dhe, ishin në pritje të daljes së shpresës nga Kutia që hapi Edi Rama dhe po blente e vjedhte vota sheshit!
Fatkeqësisht, Shqipëria u bë një vend edhe më i pamëshirshëm se sa e bëri kjo qeveri socialiste për katër vjet, Edi Rama mori mandatin e dytë qeverisës dhe e bëri të qartë që të keqes që njihnin dhe kishin parë nga Kutia, nuk ishte asgjë nga ajo që po përgatiste në vitet në vijim.
Nuk keni parë gjë akoma, ishte zotimi i tij, kështu dhe ndodhi! Shpresa nuk po dilte nga Kutia dhe Edi Rama edhe pas 8 viteve në pushtet, në sy të amerikanëve vodhi zgjedhjet e vitit 2021 duke e lënë të grisur para pragut të Ambasadës së SHBA, Kodin Zgjedhur që e kishte firmosur me doçkën e tij kriminale në një ceremoninë e rastit!
Në 11 Majin e vitit 2025 skenari ishte shumë më makabër, me një qeveri të konsumuar, me shumicën e ministrave në burg dhe sondazhet që i mbërrinin Edi Ramës me 32-35% të votave që mund të fitonte!
Historia njerëzore ka arritur të shënoj shumë lloje të manipulimeve zgjedhore, por si këto të Edi Ramës më 11 Maj ndonëse premtimin e vetëm e kishte anëtarësimin në BE, nuk ka parë as OSBE, as ODIHR, as shpirti i shenjtë!
Kapitulli që hapi Edi Rama me rinumërimin sado shpresëdhënës që mund të jetë nuk është Shpresa që mund të dalë nga Kutia, ndonëse shumë prej shqiptarëve mund ta shohin nga frëngjia e tyre duke e mos e menduar si kurth i Ramës!
Në rastin më të mirë, rinumërimi mund ti mundësoj Ilir Alimehmetit që të fitoj mandatin e Agron Shehajt, e ndoshta edhe të Jorida Tabakut, e ç’rëndësi ka edhe nëse Blerina Gjylameti ia merr mandatin Olta Xhaçkës; Mjaft zemërgjerë ishte kalemi i Kuçit!
Belinda Balluku mund të zhgënjehet në Fier por një mandat do ta humb me rinumërim, pavarësisht se të vjedhura i ka edhe 4 të tjerë, histori që mund të jetë pëlqyer edhe në qytetin bregdetar të Durrësit!
Ndërsa Elbasani si qytet me përplot histori kriminale, nuk mund të ketë rast të mirë, por vetëm lejekthimi nga Edi Rama të një mandati te PD, sepse për të folur në këtë fole të trafikut të kokainës perëndimore për zgjedhje të lira dhe të ndershme duhet të kesh problem me vetëveten!
Me mbylljen e këtij procesi të rimumërimit, pra, me mbylljen e Kutisë që Edi Rama e hapi në vitin 2017 dhe Shpresa nuk doli, shqiptarëve do t’ju duhet të bashkëjetojnë edhe për ca kohë në vendin e pamëshirshëm që sundohet nga komunistët për të krijuar mundësitë e hapjes së sërishme të Kutisë, siç e hapi Pandora, derisa në botë të vuajtur shqiptare të dal Shpresa.
