Shqipëria e fillon ditën me një tërmet të fuqishëm, ja ku ishte epiqendra

Një tërmet i fuqishëm me magnitudë 4.5 të shkallës Rihter ka tronditur mëngjesin e sotëm Krujën ndërsa krijoi panik edhe në qytetet, Durrës dhe Tiranë.

Tërmeti i cili u regjistrua në orën 05:04, sipas Qendrës Mesdhetare Sizmologjike, EMSC, ishte me epiqendër vetëm 12 kilometra nga Kruja dhe 16 kilometra nga kryeqyteti, Tiranë, dhe thellësi 5 kilometra ndërsa ka shkaktuar panik ndër qytetarët, ku nuk ka munguar as paniku ndër turistë.

“Ishte një zë i fuqishëm që më zgjoi, ”, “Ishte shumë shkurt, por u ndie shumë”, “Goditje e fortë”, ishin disa nga komentet e qytetarëve të tronditur të Krujës nga tërmeti i cili u pasua, sipas EMSC, edhe nga 7 pasgoditje, me magnitudë nga 2.2 – 3.7 të shkallës Rihter.

Pasgoditja e fundit u shënua në orën 07:28 ku epiqendra u zhvendos në Detin Adriatik, 30 kilometra nga Durrësi dhe 59 kilometra nga Tirana, me magnitudë 2.5 të shkallës Rihter dhe thellësi 15 kilometra.