Ekonomia po rritet, por punësimi ishte me rënie janar-mars 2025

Shkalla e punësimit erdhi më rënie në tremujorin e parë 2025 në krahasim me të njëjtin periudhë të një viti më parë, për shkak të rënies së fortë të punësimit në sektorin e bujqësisë.

Sipas të dhënave të INSTAT shkalla e punësimit për popullsinë 15 vjeç e lart ishte 58.3 për qindNumri i të punësuarve për popullsinë 15 vjeç e lart, nga tremujori i parë i vitit 2024 në tremujorin e parë 2025, është ulur me 0.8 për qind.

Në terma vjetorë, punësimi është ulur me 9.3 për qind në sektorin e bujqësisë, ndërsa është rritur me 0.1 për qind në sektorin e industrisë dhe me 6.4 për qind në sektorin e shërbimeve.

Krahasuar me tremujorin e mëparshëm, në tremujorin e parë 2025, punësimi për popullsinë 15 vjeç e lart është rritur me 0.3 për qind. Punësimi ulet me 2.7 për qind në sektorin e bujqësisë dhe me 0.8 për qind në sektorin e industrisë, ndërsa është rritur me 3.3 për qind në sektorin e shërbimeve.

Shkalla zyrtare e punësimit për popullsinë 15–64 vjeç është 69.5 për qind. Krahasuar me të njëjtin tremujor të një viti më parë, kjo shkallë është rritur me 1.2 pikë përqindje, dhe në raport me tremujorin e katërt 2024, rritja është 1.1 pikë përqindje.

Shkalla zyrtare e papunësisë për popullsinë 15 vjeç e lart është 8.7 për qind. Ky tregues është ulur me 0.1 pikë përqindje si në tremujorin e parë të vitit 2024, ashtu edhe me tremujorin e mëparshëm. Shkalla e pjesëmarrjes në forcat e punës, për popullsinë 15–64 vjeç, është 76.7 për qind në tremujorin e parë 2025.

Ky tregues është rritur me 1.2 pikë përqindje si në krahasim me tremujorin e parë të vitit 2024, ashtu edhe me tremujorin e katërt 2024.

Për gratë, shkalla e pjesëmarrjes në forcat e punës është 70.9 për qind, ndërsa për burrat ky tregues është 82.8 për qind.

Për burrat, shkalla e pjesëmarrjes në forcat e punës është 12.0 pikë përqindje më e lartë sesa për gratë. Krahasuar me të njëjtin tremujor të vitit 2024, shkalla e pjesëmarrjes në forcat e punës për gratë është rritur me 1.5 pikë përqindje, dhe për burrat me 0.9 pikë përqindje.

Gjatë tremujorit të parë të vitit 2025, shkalla e pjesëmarrjes në forcat e punës për të rinjtë e moshës 15-29 vjeç është 54.5 për qind.

Ky tregues është ulur me 0.5 pikë përqindje, krahasuar me tremujorin e parë të vitit 2024, ndërsa është rritur me 0.9 pikë përqindje, në krahasim me tremujorin e katërt 2024. Për popullsinë 30-64 vjeç, në tremujorin e parë 2025, shkalla e pjesëmarrjes në forcat e punës është 85.0 për qind.

Shkalla e punësimit për burrat e grup-moshës 15-64 vjeç është 75.8 për qind, ndërsa për gratë është 63.3 për qind. Krahasuar me të njëjtin tremujor të vitit 2024, shkalla e punësimit është rritur për burrat me 1.4 pikë përqindje dhe për gratë me 1.0 pikë përqindje.

Në tremujorin e parë të vitit 2025 shkalla e punësimit të të rinjve është 44.8 për qind. Krahasuar me tremujorin e parë të vitit 2024, shkalla e punësimit të të rinjve është rritur me 0.9 pikë përqindje dhe në krahasim me tremujorin e katërt 2024 ështe rritur me 1.4 pikë përqindje. Për popullsinë 30- 64 vjeç, në tremujorin e parë 2025, shkalla e punësimit është 78.6 për qind.

Në tremujorin e parë të vitit 2025, shkalla zyrtare e papunësisë është 7,6 % për burrat dhe 9,8 % për gratë. Krahasuar me të njëjtin tremujor të vitit 2024, shkalla e papunësisë është rritur me 0,4 pikë përqindje për gratë, ndërsa është ulur me 0,6 pikë përqindje për burrat.

Shkalla e papunësisë për të rinjtë 15–29 vjeç është 17.9 për qind. Krahasuar me tremujorin e parë të vitit 2024, ky tregues është ulur me 2.4 pikë përqindje, dhe në krahasim me tremujorin e katërt të vitit 2024 është ulur me 1.3 pikë përqindje.

Për grupmoshën 30–64 vjeç, shkalla e papunësisë është 7.5 për qind. Në terma vjetorë, ky tregues është rritur me 0.4 pikë përqindje, dhe krahasuar me tremujorin e katërt të vitit 2024 është rritur me 0.3 pikë përqindje.

Popullsia ekonomikisht jo-aktive Në tremujorin e parë të vitit 2025, 17.2 për qind e popullsisë ekonomikisht joaktive në moshë pune (15–64 vjeç) është e angazhuar për të përmbushur detyrat shtëpiake, 12.3 për qind është në pension ose pension të parakohshëm, ndërsa 15.2 për qind është në paaftësi të përhershme për punë.

Gjithashtu, 2.5 për qind e popullsisë ekonomikisht joaktive në këtë grupmoshë deklaron se nuk po kërkon punë pasi beson se nuk ka punë të disponueshme, dhe për këtë arsye klasifikohet si të papunë të dekurajuar.

Të rinjtë e moshës 15-29 vjeç që deklaruan se janë nxënës/studentë ose në trajnim përbëjnë 72.7 për qind të të rinjve ekonomikisht jo-aktivë. Ndër të rinjtë e moshës 15-29 vjeç ekonomikisht jo-aktivë, 1.1 për qind klasifikohen si të papunë të dekurajuar.

Në popullsinë e moshës 30-64 vjeç, ky grup përbën 15.0 për qind të popullsisë ekonomikisht jo-aktive të kësaj grup-moshe./Monitor/