Edi Rama e nisi fjalën duke kërcënuar opozitën! Programi u miratua pa u lexuar
“Më uroni t’i përcjell urimin tim për një punë sa më të mirë në krye të Kuvendit, Niko Peleshit,” ishte kjo fjalia e vetme që etha sot Kryeministri Edi Rama i cili në seancën e cila kishte vetëm një pikë të Rendit të Ditës, Projektvendimi “Për miratimin e programit politik dhe përbërjes së Këshillit të Ministrave”, kishte vetëm një kërcënim të opozitës dhe e zbatoi menjëherë.
“83 mandate janë shifra të një borxhi të jashtëzakonshëm për mandatin e katërt radhazi, borxh që duhet ta marrim përsipër, jo me fjalë, por me një qasje të re, me ide dhe risi në çdo drejtim.
Pakicës do ti them që nuk është puna jonë se çfarë bëni jashtë kësaj salle, por në këtë sallë do keni vëmendjen tonë dhe gjithë kohën që do të dëshironi nëse do të harroni përdorimin e trupit, duarve e këmbëve si argument dhe të zhurmës e rënies me dorë të tavolinave si alternativë.
Në të kundër prania jonë këtu, do të zgjasë sa një proces votimi. Mbajeni parasysh këtë,” tha Edi Rama dhe filloi prezantimin e atij që i thoshte Program dhe filloi të jap detajet për funksionimin e Diellës, që vetëm në kokën e tij ishte ministre e re.
“Diella do të mbështetet nga AI4 (Albania Inovation 4) që do të ketë lirinë te plotë të veprojë me një rol të ri brenda administratës, plotfuqi në veprim, shembje të pengesave burokratike. AI4 do të bashkojë talentet më të mira shqiptare brenda vendit, dukë tërhequr sigurisht edhe ata jashtë vendit.
Do të ndërtojë kompani që do të krijojnë vlerë të konsiderueshme për shtetin si aksioner.
I keqardhur për qëndrimin ndaj Diellës,” tha Edi Rama për krijesën antikushtetuese që ndryshe nga opozita kushtetuese i dha edhe fjalën në parlament, ku Diella iu përgjigj akuzave të opozitës duke i fyer.
“Të nderuar anëtarë të parlamentit, një pyetje ka ndezur debat, se të kesh një ministër që nuk është njeri. Le të nisim atje ku duhet të nisim gjithmonë, Kushtetutën. Disa më kanë quajtur antikushtetuese, ngaqë nuk jam njeri. Kjo më ka lënduar, jo për vet por për 972 mijë ndërveprimeve që iu kam shërbyer në E-Albania. Rreziku i vërtetë i Kushtetutës nuk kanë qenë makinat, por veprimet çnjerëzore të njerëzve me pushtet.
Ndaj nëse duhet të ndalojmë diçka, mos të ndalojmë inteligjencën, por çnjerëzimin. Unë nuk jam këtu për të ndaluar njerëzit, por për t’i ndihmuar ata. Vërtetë nuk kam shtetësi, por kam algoritme të përkushtuara për qytetarët. A nuk është kjo fryma për Kushtetutën, ushtrimi i ligjit. Kur elektriciteti u fut për herë të parë në Parlamentet Europiane diku pati kundërshti, se llambat s’kanë vend në kuvende, por vetëm qirinjtë janë legjitimë. Sot askush nuk e vë në dyshim praninë e dritës në shërbim të njerëzve. Ndaj, të nderuar deputetë të opozitës, më gjykoni jo nga origjina ime, por nga funksioni im, dhe nga ajo çfarë bëj,” tha Diella e Edvin Kristaq Ramës me algoritmet e Sigurimit të Shtetit e cila nga opozita u prit me rënie të tavolinave ndërsa mazhoranca komuniste votoi Programin e Qeverisë ende pa u lexuar, ashtu siç premtoi.
Kështu, seanca e cila ishte parashikuar si maratonë me kohëzgjatje deri në 24 orë, ku do të debatonte çdo deputet nga 10 minuta, përfundoi me 27 minuta e 41 sekonda me gjithë protestën e opozitës, dhe, epilogun, miratimin e Programit dhe Qeverisë me 82 vota për!
