Te i dyshuari për vrasjen e Afrim Bunjakut në Banjskë, gjendet arsenal ushtarak

Në veri të Kosovës sërish gjenden uniforma ushtarake, antiplumbë, karikatorë të armës së gjatë AK-47 me municion si dhe mjete tjera ushtarake, që sipas Ministrit në detyrë të Punëve të Brendshme, Xhelal Sveçla, në pronën e Nemanja Radivojeviçit, i dyshuari kryesor për vrasjen e rreshterit policor Afrim Bunjaku në Banjskë

“Më datën 18.09.2025 rreth orës 09:45 njësia e hetimeve e Stacionit Policor Zveçan kanë hasur në një rimorkio ku pas kontrollit kishin hasur ne dy thasë me uniforma, antiplumbë, 5 karikatorë të AK-47 me municion dhe paisje tjera ushtarake,” thekson Policia e Kosovës përmes njoftimi duke saktësuar edhe llojin e armatimit të konfiskuar.

Ndërkohë ka reaguar Ministri në detyrë i Punëve të Brendshme, Xhelal Sveçla, duke folur për zbulimin e municionit, pajisjeve ushtarake, policore dhe veshjeve kamuflazhi në pronën e Nemanja Radivojeviç, i njohur si “Gandi”, duke rikujtuar se Radivojeviç është i dyshuari kryesor për shpërthimin e bombës në Banjskë, më 24 shtator 2023, ku u vra Heroi i Kombit, rreshteri policor Afrim Bunjaku.

“Për aq kohë sa Serbia refuzon t’i dorëzojë këta persona, ata mbeten një rrezik i drejtpërdrejtë për Republikën tonë. Pajisjet e gjetura sot janë dëshmi të qarta se ky grup kriminal, i dirigjuar nga Serbia, ka bërë përgatitje të gjata dhe nuk ka hequr dorë nga përpjekjet për të cenuar rendin juridik e kushtetues të Republikës së Kosovës,| thekson Xhelal Sveçla duke siguruar:

“Shteti ynë, institucionet tona të sigurisë, janë më të shtrira e më të forta se kurrë në këtë pjesë të vendit dhe nuk do të tolerojnë as edhe një grimcë të këtyre elementeve kriminale e terroriste të cenojnë Kosovën.”

Ndryshe, më 24 shtator 2023 në Banjskë, një grup i serbëve të armatosur sulmoi Policinë e Kosovës, duke vrarë rreshterin Afrim Bunjaku. Gjatë këmbimit të zjarrit u vranë edhe tre sulmues serbë.

Përgjegjësinë për sulmin e ka marrë ish-nënkryetari i Listës Srpska, Milan Radoiçiç, i cili aktualisht strehohet në Serbi nën kujdesin e Presidentit të këtij shteti kriminal, Aleksandar Vuçiç.

Ndërsa autoritetet në Kosovë kanë ngritur aktakuzë dhe gjykimi për këtë rast po zhvillohet ndaj tre të akuzuarve, e Radoiçiç me 41 të tjerë të akuzuar ndodhen në arrati.

Pas këtij akti terroist në Banjskë, autoritetet e Kosovës ka gjetur dhe konfiskuar shumë pajisje ushtarake në Veri.