Sulm kibernetik në aeroportet kryesore evropiane

Një sulm kibernetik që në shënjestër kishte ofruesit e sistemeve të regjistrimit dhe hipjes në avion ka ndërprerë operacionet në disa aeroporte kryesore evropiane, duke përfshirë atë londinez Heathrow, Brukselin dhe Berlinin, që shkaktoi dhe vonesa e anulime fluturimesh, thanë operatorët.

Sulmi çaktivizoi sistemet e automatizuara, duke lënë vetëm procedurat manuale të regjistrimit dhe hipjes në avion, tha aeroporti Zaventem pranë Brukselit.

“Kjo ka një ndikim të madh në oraret e fluturimeve dhe për fat të keq do të shkaktojë vonesa dhe anulime fluturimesh”, tha operatori në një deklaratë në faqen e tij të internetit.

“Ofruesi i shërbimit po punon në mënyrë aktive për problemin dhe po përpiqet ta zgjidhë atë sa më shpejt të jetë e mundur”, shtoi ajo. Pasagjerët që kishin planifikuar fluturime drejt aeroporteve të prekura u këshilluan të konfirmonin udhëtimin e tyre me linjën ajrore përpara se të niseshin për në aeroport.

“Për shkak të një problemi teknik me ofruesin e shërbimit të sistemit që operon në të gjithë Evropën, kohët e regjistrimit janë më të gjata. Po punojmë për një zgjidhje të shpejtë”, tha aeroporti i Berlinit në një deklaratë në faqen e tij të internetit. Një zëdhënës tha gjithashtu se aeroporti i Frankfurtit nuk u prek nga sulmi.