Padi në Gjykatën Kushtetuese, PD: Të shfuqizohen, Dekreti i Presidentit për Diellën dhe Rregullorja

Grupi Parlamentar i Partisë Demokratike ka dorëzuar dy padi në Gjykatën Kushtetuese, shfuqizimin si të papajtueshme me Kushtetutën, të ndryshimeve të njëanshme të mazhorancës në Rregulloren e Parlamentit, dhe, shfuqizimin, si antikushtetues, të dekretit të Presidentit për “ngritjen dhe funksionimin e Ministrit Virtual të Inteligjencës Artificiale Diella”.

“1. Shfuqizimi i vendimit nr. 57, datë 16.09.2025 të Kuvendit të Shqipërisë “Për disa ndryshime në vendimin e Kuvendit nr. 166, datë 16.12.2004, “Për miratimin e Rregullores së Kuvendit të Republikës së Shqipërisë”, të ndryshuar”, si i papajtueshëm me Kushtetutën e Shqipërisë.

2. Pezullimin e vendimit nr. 57, datë 16.09.2025 të Kuvendit të Shqipërisë “Për disa ndryshime në vendimin e Kuvendit nr. 166, datë 16.12.2004, “Për miratimin e Rregullores së Kuvendit të Republikës së Shqipërisë”, të ndryshuar”, deri në dhënien e një vendimi përfundimtar,” thuhet në dy kërkesat e Grupit Parlamentar të Partisë Demokratike drejtuar Gjykatës Kushtetuese

Pas këtyre dy padive në Gjykatën Kushtetuese nga ana e Partisë Demokratike, Kryetari i Parlamentit, Niko Peleshi, ka thirrur në një takim krerët e grupeve parlamentare, Taulant Balla, Gazment Bardhi, Tedi Blushi dhe Fatmir Mediu.