Nicolas Sarkozy dënohet me 5 vjet burg, dënimin do ta vuaj në “Santé” të Parisit
Ish-Presidenti francez Nicolas Sarkozy është dënuar me pesë vjet burg nga Gjykata e Parisit e cila e shpalli fajtor për konspiracion për të kryer një vepër penale, në një rast që lidhet me marrjen e miliona eurove fonde të paligjshme nga ish-udhëheqësi libian tashmë i ndjerë, Muammar Gaddafi.
Sarkozy, i cili gjithmonë i ka mohuar akuzat, u akuzua për bashkëpunim me Gaddafin në vitin 2005, kur ishte ministër i brendshëm i Francës, për të marrë fonde për fushatën në këmbim të mbështetjes së qeverisë libiane të atëhershme të izoluar në skenën ndërkombëtare.
I liruar nga akuzat për korrupsion, por fajtor për konspiracion
Gjykatësja e liroi Sarkozyn nga akuzat e tjera, përfshirë korrupsionin, duke thënë se nuk kishte prova që Sarkozy bëri ndonjëherë një marrëveshje të tillë me Gaddafin ose që paratë e dërguara nga Libia arritën në fushatën zgjedhore të Sarkozyt. Por ajo tha se Sarkozy ishte fajtor për konspiracion kriminal për lejimin e bashkëpunëtorëve të ngushtë të kontaktojnë njerëz në Libi për të provuar të marrin fonde për fushatën.
Ish-presidenti francez është në gjyq që nga janari dhe Sarkozy ka këmbëngulur se çështja është e motivuar politikisht.
Vendimi thotë se Sarkozy do të shkojë në burg pavarësisht nëse apelon. Gjykatësja gjithashtu urdhëroi Sarkozin të paguajë një gjobë prej 100,000 eurosh.
Sarkozi përsëriti edhe sot se është i pafajshëm dhe tha se do të apelojë vendimin e gjykatës. “Nëse ata me të vërtetë duan që unë të fle në burg, do të fle në burg, por me kokën lart”, u tha Sarkozy gazetarëve pas vendimit.
Sarkozi, 70 vjeç, ishte president francez nga viti 2007 deri në vitin 2012.
Hetimi dhe akuzat
Hetimi u hap në vitin 2013, dy vjet pasi Saif al-Islam, djali i udhëheqësit të atëhershëm libian, e akuzoi për herë të parë Sarkozynë se kishte marrë miliona nga babai i tij për të financuar fushatën.
Biznesmeni libanez Ziad Takieddine, i cili ka qenë prej kohësh ndërmjetës midis Francës dhe Lindjes së Mesme, tha vitin pasardhës se kishte prova me shkrim se fushata e Sarkozysë ishte financuar “kryesisht” nga Tripoli dhe se pagesat prej 50 milionë eurosh vazhduan pasi ai u bë president.
Që nga humbja e zgjedhjeve presidenciale të vitit 2012, Sarkozy ka qenë shënjestër e disa hetimeve penale.
Ai ka apeluar gjithashtu një vendim të shkurtit 2023 që e shpalli fajtor për shpenzime të tepërta në fushatën e tij të vitit 2012 dhe më pas punësimin e një firme PR për ta mbuluar atë. Ai u dënua me një vit burg, gjashtë muaj nga të cilët u pezulluan.
Në vitin 2021, ai u shpall fajtor për përpjekje për të korruptuar një gjyqtar në vitin 2014, duke u bërë ish-presidenti i parë francez që mori një dënim me burg.
Një gjykatë apeli në Paris vendosi në dhjetor se ai mund ta vuante dënimin e tij në shtëpi duke mbajtur një byzylyk elektronik.
