Pas Vendimit të Gjykatës Kushtetuese, Edi Rama: Kushtetuesja ta kthejë Erion Veliajn në detyrë!
Pas Vendimit të Gjykatës Kushtetuese e cila bëri nul vendimin e Këshillit të Ministrave për shkarkimin e Kryetarit të Bashkisë Tiranë, Erion Veliaj, si dhe Dekretin për shpalljen e zgjedhjeve për Kryetar të ri nga Presidenti Republikës, ka reaguar Kryeministri Edi Rama duke vlerësuar se tani është koha që Kushtetuesja ta kthejë Erion Veliajn në detyrë, për të vijuar procesin gjyqësor në gjendje të lirë.
“Çdo njeri normal që nuk sheh tek qëndrimi i Kushtetueses një qëndrim të verbër kundër qeverisë në dëm të madh të Tiranës, po një qëndrim të vendosur parimor, nuk ka se si të mos presë që me të njëjtën parimësi, kur të gjykojë paraburgimin e tij, Kushtetuesja ta kthejë Erion Veliajn në detyrë, për të vijuar procesin gjyqësor në gjendje të lirë apo jo,” tha Edi Rama në reagimin e tij përmes rrjetit social X duke menduar që ta shes një Vendim mediokër të Gjykatës Kushtetuese i cili korrupsionin dhe pastrimin e parave nuk e trajton si krim të rëndë, si provë që ai nuk i paska kapur të gjitha pushtetet, dhe, kjo sipask Kryeministrit të Shqipërisë është sa e qartë, aq edhe e mirë
Reagimi:
Disa rrjedhime logjike nga vendimi i Gjykatës Kushtetuese:
1. Ja që edhe njëherë u provua se nuk i paskam kapur unë të tëra pushtetet dhe kjo është një gjë sa e qartë, aq edhe e mirë apo jo
2. Nëse Tirana nuk do të ketë zgjedhje deri në 2027-ën dhe Kushtetuesja mendon se kryebashkiaku i burgosur i Tiranës nuk mund të largohet përveçse me zgjedhje, atëherë disproporcioni i mbajtjes së tij në qeli nuk është më thjesht në dëm të lirive e të drejtave kushtetuese të personit, po edhe në dëm të së drejtës kushtetuese të popullit të kryeqytetit për t’u shërbyer nga i zgjedhuri i vet apo jo
3. Çdo njeri normal që nuk sheh tek qëndrimi i Kushtetueses një qëndrim të verbër kundër qeverisë në dëm të madh të Tiranës, po një qëndrim të vendosur parimor, nuk ka se si të mos presë që me të njëjtën parimësi, kur të gjykojë paraburgimin e tij, Kushtetuesja ta kthejë Erion Veliajn në detyrë, për të vijuar procesin gjyqësor në gjendje të lirë apo jo
Pika 1 dhe 2 janë të sigurta, pika 3 mbetet për t’u parë, ndërkohë le të urojmë që kushdo ka në dorë ta ndihmojë zgjidhjen e këtij ngërçi absurd, të kujtohet se kryeqyteti nuk mund të trajtohet si jetim, për vite me radhë.
