Buxheti 2026 miratohet në Parlament

Me 81 vota pro dhe 16 kundër, Parlamenti miratoi pas mesnate buxhetin e vitit 2026.

Plani financiar i vitit të ardhshëm parashikon të ardhura rreth 8.5 miliardë euro dhe shpenzime afërsisht 8.9 miliardë euro, që përfaqësojnë rreth 31.9% të PBB-së. Krahasuar me buxhetin e rishikuar të 2025-s, shpenzimet rriten me afërsisht 550 milionë euro. Ndërkohë deficiti mbetet në nivelin 2.3% të PBB, po aq sa pritet të jetë edhe këtë vit.

Një pjesë e rëndësishme e buxhetit synon politikat sociale. Vetëm për vitin 2026, parashikohet një rritje e ndjeshme e mbështetjes financiare në këtë drejtim: 100 milionë euro për rritjen e pensioneve sipas skemës së re dhe 135 milionë euro për rimbursimin e medikamenteve. Po ashtu, qeveria ka parashikuar fondet e nevojshme për zbatimin e pagës minimale prej 50 mijë lekësh në muaj. Për herë të parë, parashikohet edhe indeksimi i pagave në administratën publike me 2.5%, që do të hyjë në fuqi më 1 janar 2026.

Investimet publike të vitit të ardhshëm arrijnë në rreth 1.9 miliardë euro, ndërsa fondi i rindërtimit do të jetë 50 milionë euro. Për 11 projektet koncesionare parashikohen 120 milionë euro, pak më pak se një vit më parë.

Edhe për 2026, prioritet mbeten shëndetësia dhe mbrojtja sociale, infrastruktura dhe energjia, arsimi dhe ushtria.

Në ndarjen sipas institucioneve, buxheti më i madh shkon për Ministrinë e Shëndetësisë dhe Mirëqenies Sociale, me rreth 853 milionë euro, që mbulon pagat dhe investimet në këtë sektor. Ministria e Infrastrukturës dhe Energjisë përfiton rreth 800 milionë euro, të fokusuara kryesisht në projekte rrugore dhe hekurudhore. Ministria e Arsimit ka një buxhet prej 680 milionë euro, që mbështet pagat e mësuesve dhe investimet në shkolla. Ndërsa Ministria e Mbrojtjes merr rreth 610 milionë euro, kryesisht për forcimin e kapaciteteve të ushtrisë dhe për të përmbushur angazhimet e Shqipërisë në kuadër të NATO-s.

Ndryshe, Pas zhvillimit të dy interpelancave, Parlamenti i Shqipërisë miratoi Paketën Fiskale prej 8 projektligjesh të cilat sollën debate mes mazhorancës dhe opozitës.

Megjithatë, shumica qeverisëse kaloi ndryshimet kryesore tatimore, përfshirë marrëveshjen e paqes fiskale, fshirjen e plotë të detyrimeve të papaguara deri në 2014 në tatime dhe dogana , rivlerësimin e pasurive të paluajtshme, ndryshimet në ligjin për procedurat tatimore që reduktojnë përdorimin e parasë cash dhe ndryshimet në ligjin për TVSH-në për zbatimin e kompensimit 10% te fermerët.

Kështu, Parlamenti miratoi këto projektligje:

Projektligj “Për disa ndryshime dhe shtesa në ligjin nr. 9920, datë 19.5.2008, “Për procedurat tatimore në Republikën e Shqipërisë””, të ndryshuar, u miratua me vota 81 PRO, 3 KUNDËR, 0 ABSTENIM.

Projektligj “Për disa ndryshime në ligjin nr. 92/2014 “Për tatimin mbi vlerën e shtuar në Republikën e Shqipërisë”, u miratua me 80 vota PRO, 25 KUNDËR, 0 ABSTENIM.

Projektligj “Për disa ndryshime dhe shtesa në ligjin nr. 29, datë 30.3.2023, “Për tatimin mbi të ardhurat”, u miratua me 84 vota PRO, 26 KUNDËR, 0 ABSTENIM.

Projektligj “Për disa shtesa në ligjin nr. 9632, datë 30.10.2006, “Për sistemin e taksave vendore”” të ndryshuar, u miratua me 81 vota PRO, 18 KUNDËR, 0 ABSTENIM.

Projektligj “Për disa ndryshime në ligjin nr. 87/2019 “Për faturën dhe sistemin e monitorimit të qarkullimit, të ndryshuar, u miratua me 81 vota PRO, 27 KUNDËR, 0 ABSTENIM.

Projektligj “Për marrëveshjen e paqes fiskale”, u miratua me vota 75 PRO, 20 KUNDËR, 0 ABSTENIM.

Projektligj “Për rivlerësimin e pasurisë së paluajtshme”, u miratua me 76 vota PRO, 22 KUNDËR, 0 ABSTENIM.

Projektligj “Për fshirjen, shuarjen dhe pagesën e detyrimeve tatimore ndaj administratës tatimore qendrore e të detyrimeve të pagueshme në doganë”, u miratua me 73 vota PRO, 14 KUNDËR, 0 ABSTENIM.

Sa i përket projektligjit “Për buxhetin e vitit 2026″, në fjalën e saj kryetarja e Komisionit të Ekonomisë, Milva Ekonomi, tha se janë pranuar kërkesat e 7 komisioneve për të shtuar shpenzimet për disa institucione me vlerë 504.9 milionë lekë, që do të mbulohen brenda tavaneve të parashikuara në buxhet. Ndërsa, sa i takon 50 amendimeve të opozitës, sipas saj, cënonin parametrat fiskale pasi rrisnin me 278.9 miliardë lekë shpenzimet./Monitor/