Albin Kurti: Bllokimet për konstituimin e institucioneve tashmë janë inekzistente

Kryeministri në detyrë i Kosovës, Albin Kurti, tha sot se bllokimet në konstituimin e institucioneve të reja tashmë janë inekzistente, pas rezultateve të zgjedhjeve të 28 dhjetorit, ku Vetëvendosje doli e para me mbi 49 për qind të votave, ndërsa kanë mbetur të numërohen edhe votat e diasporës në përfaqësitë diplomatike, votat me postë dhe ato me kusht.

“Rezultati është më i qartë se asnjëherë më parë. Ne kemi pritur se do ta tejkalojmë rezultatin e 9 shkurtit sivjet, por duket që po e tejkalojmë edhe rezultatin e 14 shkurtit të vitit 2021. Bllokimet në konstituimin e Kuvendit dhe pengesat në formimin e qeverisë së re tashmë janë inekzistente,” tha Albin Kurti ndërsa për zgjedhjen e Presidentit në muajin mars, ai tha se fillimisht duhet të pritet certifikimi i rezultateve dhe konsituimi i legjislaturës së dhjetë.

“Duhet të presim certifikimin e rezultatit, pastaj konstituimin e Kuvendit dhe të shohim përbërjen e legjislaturës së dhjetë. Vetëm pas formimit të qeverisë mund të flasim për zgjedhjen e presidentes apo presidentit të ri. Sot është dita e fundit e vitit 2025, shpejt do ta takoj presidenten Osmani dhe duhet të bisedojmë njëherë bashkë për rrugën përpara.”

Kurti: Posta e Kosovës me 1 milion euro fitim, s`ka më operime ilegale

Kryeministri në detyrë, Albin Kurti, gjatë vizitës në Postën e Kosovës bashkë me ministren në detyrë të Ekonomisë, Artane Rizvanolli, konstatoi përmbyllen e një viti të suksesshëm me rreth një milion euro fitim, në Kosovë tha se nuk operon më Posta e Serbisë e dinari nuk është mjet pagese.

“Bashkëbiseduam për sukseset e kësaj ndërmarrje publike e cila këtë vit po e mbyll me rreth 1 milionë euro fitim, pas vitit të kaluar kur kishte afër 300 mijë euro fitim. Posta e Kosovës i ka rreth 850 punëtorë, nga të cilët më shumë se gjysma janë postierë apo sportelistë. Përveç kësaj është për t’u përshëndetur fakti që po zgjerohet rrjeti i zyrave dhe i shërbimeve postare.

Gjithsej i ka 166 zyre në Kosovë, prej të cilave 16 janë në veri të Ibrit në Republikën e Kosovës. Janë ndërprerë rrjedhjet financiare, janë shuar strukturat ilegale, nuk operon më në Kosovë as posta e Serbisë dhe as kursimorja postare e Serbisë. Dinari nuk është më mjet pagese dhe nuk ka pasur vakum, sepse Posta e Kosovës ishte aty që t’i ofrojë të gjitha shërbimet të cilat dikush konsideronte se mund të mungojnë atëherë kur ndërpritet ilegaliteti që kishim në të kaluarën,” tha Kryeministri në detyrë, Albin Kurti ndërsa përgëzoi menaxhmentin, bordin por edhe të gjithë punëtorët e Postës së Kosovës për këto suksese duke përfunduar:

“Gjithashtu duhet përmendur edhe faktin që Posta e Kosovës është shërbim publik universal, i shpejtë, i sigurt dhe i lirë. Pra, nuk e mat dërgesën me koston që ka, por me dobinë e qytetarit, andaj falënderoj të gjithë punëtorët që ditë e natë shërbejnë anë e mbanë Kosovës, edhe në fshatrat më të largëta, në mënyrë që askush në Republikën tonë të mos ndihet anash, por të jemi qytetarë të barabartë ashtu siç e kërkon kushtetueshmëria e një vendi demokratik.”