Davos, Presidentja e Kosovës, Vjosa Osmani në ceremoninë e themelimit të Bordit të Paqes

Presidentja Vjosa Osmani, me ftesë të Presidentit të Shteteve të Bashkuara, Donald Trump, sot përfaqëson Kosovën në ceremoninë e themelimit të Bordit të Paqes.

“Mirëmëngjes nga Davos, ku jemi me ftesë të Presidentit Trump, në ceremoninë e themelimit të Bordit të Paqes,” shprehet Presidentja Vjosa Osmani përmes rrjetit social Facebook.

Ndryshe, Presidenti i SHBA, Donald Trump, ka ftuar dhjetëra udhëheqës botërorë që t’i bashkohen nismës së tij, Bordi i Paqes, e cila synon zgjidhjen e konflikteve globale, por diplomatët thonë se ajo mund të dëmtojë punën e Organizatës së Kombeve të Bashkuara.

Presidenti Trump e propozoi për herë të parë Bordin e Paqes shtatorin e kaluar, kur njoftoi planin e tij për t’i dhënë fund luftës në Gaza. Më vonë ai e bëri të qartë se mandati i Bordit do të zgjerohej përtej Gazës, për të trajtuar edhe konflikte të tjera në mbarë botën.

Presidenti amerikan do të jetë kryetari i parë i Bordit dhe, sipas Draft-Kartës, Bordi do të ketë për detyrë promovimin e paqes në botë dhe punën për zgjidhjen e konflikteve.

Sipas kartës, shtetet anëtare do të kufizohen në mandate trevjeçare, përveç rasteve kur paguajnë nga 1 miliard dollarë secila për të financuar aktivitetet e bordit dhe për të fituar anëtarësim të përhershëm.

Mes tyre janë aleatë të Lindjes së Mesme si Izraeli, Arabia Saudite, Emiratet e Bashkuara Arabe, Bahrejni, Jordania, Katari dhe Egjipti. Anëtarë të NATO-s, Turqia dhe Hungaria, liderët e të cilave shtete kanë kultivuar lidhje të mira personale me Donald Trump, kanë rënë gjithashtu dakord të marrin pjesë, ashtu si edhe Maroku, Pakistani, Indonezia, Kosova, Uzbekistani, Kazakistani, Paraguaji dhe Vietnami.