Mirëqenia sociale, Ambasadori Gonzato: Shqipëria përfitoi 100 milionë euro nga BE

Me rastin e prezantimit të 14 shërbimeve të reja sociale për fëmijët dhe nënat në nevojë, Ambasadori i BE-së në Shqipëri, Silvio Gonzato, tha se mbështetja e Bashkimit Evropian për mbrojtjen sociale në Shqipëri është ndër më të lartat në Ballkanin Perëndimor, ku përmes projekteve për gjithëpërfshirjen sociale dhe punësimin BE po investon më shumë se 100 milionë euro. 

“Mirëqennia sociale është vetë forca e një kombi. Kjo çështje ka qenë në thelb të BE që nga fillimi. BE merr parasysh nivel të lartë të mirëqenies sociale dhe arsimit dhe mbrojtjes së shëndetit publik.
Nuk është rastësi që ky aktivitet sot ndodh edhe në bashkëpunim me UNICEF.
BE ka një traditë të gjatë të investimit në kapitalin njerëzor.
Mundësi të barabarta, mundësi për kushte pune dhe mundësi sociale, këto ishin tre shtyllat e veprimit tonë në kushtet e rënies së euros.

Po investojmë më shumë se 100 mln euro me projekte për punësimin dhe gjithëpërfshirjen sociale. Këto plotësohen edhe me planin e rritjes ku Shqipëria ka marrë 100 mln euro për rritjen e kapitalit njerëzor,” tha Ambasadori i BE-së në Shqipëri, Silvio Gonzato, ndërsa kishte dhe rekomandime konkrete për “Fondin Social 2026 – Garanci për Qëndrueshmërinë e Shërbimeve për Mirëqenien e Qytetarëve”:
“-Duhet të vijojmë punën mbi atë që është arritur tashmë.

-Në nivel qendror duhet të fuqizohen bashkitë. Kjo kërkon bashkëpunim të ngushtë mes qeverisjes vendore dhe asaj lokale, për këtë mendojmë se mund të ndihmojë Reforma Territoriale.

-Në nivel lokal duhet një bashkëpunim më i ngushtë me OJF

-Transparenca dhe llogaridhënia duhet të jenë në qendër të politikave, kjo pasi ndërsa Shqipëria ecën më pranë BE duhet të ketë sisteme të drejta dhe transparentë.

-Duhet një koordinim mes legjislacionit shqiptar dhe atij të BE.”

Ndryshe nga Ambasadori i BE, Kryeministri Edi Rama filloi të flas si në vitin 2013 kur kishte marrë pushtetin dhe tha se qeveria e tij trashëgoi një mal me borxhe të mëdha, por që me kalimin e viteve u përballua. Çfarë u përballua, shifra për ato grupe vulnerabël që përfitojnë nuk pati, por gallata plotë.

“Më vjen keq që gabove duke menduar që ishe i fundit, sepse pas teje pati më të rëndësishëm se ty si ministri i Pushtetit Vendor, drejtuesi i UNICEF, pastaj me erdhi radha edhe mua. Kështu që u nxitove kur na pe çik nga lart poshtë, se në fakt ti je poshtë unë jam lart, siç e shikon,” tha Edi Rama teksa falënderoi Ambasadorin Gonzato për mbështetjen duke shtuar se Bashkimi Evropian ka edhe lekët edhe mendjen, ndërsa Shqipëria ka zemrën.

“Falënderoj edhe përfaqësuesin e UNICEF. Kemi nevojë për këtë bashkëpunim. Nëse BE i ka të dyja edhe lekët edhe mendjen, UNICEF nuk ka lekë, por ka mendjen, por ka edhe zemrën. Kështu që kinezët thonë “një mendje hiç mendje, dy mendje një mendje, tre mendje dy mendje”, kështu që bashkimi i mendjeve tuaja bën një mend për ne, edhe mendja jonë, pastaj zemrën e kemi vetë ne. Ndërkohë që këta kanë edhe lekët.”